Jónas Þór Jónasson, lögmaður stéttarfélaga skipverjanna á Júlíusi Geirmundssyni ÍS sem sýktust af kórónuveirunni um borð, hefur í dag óskað eftir endurriti úr sjóprófi sem fór fram fyrir Héraðsdómi Vestfjarða í gær. Hann segir í samtali við 200 mílur málið varpa ljósi á bresti í samskiptum útgerða við íslenska sjómenn.

„Við sendum beiðni til Héraðsdóms Vestfjarða í dag. Svo fer afhending [endurritsins] eftir því hvað þau eru snögg í héraðsdómi að rita þetta upp. Þetta voru sjö klukkutíma skýrslutökur þannig að þetta mun taka einhvern tíma en ég vænti þess að fá þetta í hendur í fyrri hluta desember. Þá tökum við félögin fund um málið og metum næstu skref,“ segir Jónas Þór og bætir við að endurritið verður afhent lögreglu og saksóknara.

Félag skipstjórnarmanna, Sjómannafélag Íslands, Sjómannasamband Íslands, Verkalýðsfélag Vestfirðinga og Félag vélstjóra og málmtæknimanna kærðu í október viðbrögð  Hraðfrystihússins Gunn­var­ar hf. viðbrögð við kórónuveirusmiti um borð í tog­ar­an­um til lög­reglu.

Frétt af mbl.is

Stéttarfélög kæra og krefjast sjóprófs

Jónas Þór segir ekki hafa verið annarra kosta völ en að láta framkvæma sjópróf til þess að komast að því hvernig hlutir atvikuðust þegar hópsmitið kom upp.

„Þetta var nauðsynlegt í ljósi afstöðu útgerðarinnar um að vilja ekki tjá sig og fara í vörn. Þá þurftum við að fara þessa leið til að upplýsa um það sem gerðist í raun. Svo er þetta sönnunargagn sem við höfum upp á framhaldið, því miður bendir margt til þess að einhverjir skipverjar kunna að verða fyrir varanlegu heilsutjóni útaf þessu og það þarf að sækja þær kröfur á tryggingafélag útgerðarinnar,“ útskýrir Jónas Þór.

Hann segir annan anga málsins vera að draga lærdóm af málinu sérstaklega hvað varðar samskipti útgerða við skipverja. „Þetta er búið að draga það mál á yfirborðið því þessi samskipti eru ekki alltaf nægilega góð.“

Spurður hvort skjólstæðingar hans séu vongóðir um árangur svarar hann því játandi. „Já, af sjálfsögðu. Við höfum verið að hugsa um hagsmuni sjómannanna, það er tilgangurinn með þessu.“

Frétt af mbl.is

Skipstjórinn ósáttur við væntanleg sjópróf

Tengdar fréttir

Kórónuveiran Covid-19

Í fimm ára fangelsi fyrir að hvetja til hryðjuverka

• Stefna Norðmenn ríkinu vegna bólusetninga?
• 30% með langvarandi áhrif covid
• Mættu hafa í huga þar sem þeir kvarta á Tene
• „Er ég virkilega að deyja?“

» Fleiri tengdar fréttir

Covid-veikir skipverjar á Júlíusi Geirmundssyni

Skipstjórinn á Júlíusi Geirmundssyni sýknaður

• Skipstjóri sakfelldur vegna Covid-smits skipverja
• Segir óhugsandi að útgerðin hafi ekki ráðið för
• Sviptur skipstjóri á Júlíusi ráðinn stýrimaður
• Ekki ljóst hvort allir nái heilsu á ný

» Fleiri tengdar fréttir

• Blogga um frétt