Sjómenn gripu til aðgerða gegn breskum vörubílum
Setja bókamerki
Franskir sjómenn gripu til aðgerða til að stöðva för vörubíla með fisk frá Bretlandi í nótt. Hafa sjómennirnir mótmælt því að frönskum skipum hafi enn ekki verið veitt heimild til veiða innan bresku lögsögunnar þrátt fyrir fyrirheit þess efnis í samningi Evrópusambandsins og Bretlands.
Í franska bænum Boulogne-sur-Mer í gærkvöldi voru fleiri en hundrað sjómenn mættir á skimunarstöð fyrir vörubíla sem flytja fisk frá Bretlandi til hafnarborganna Dunqerque og Calais. Kveiktu sjómennirnir í vörubrettum og dekkjum til að halda hita. Þá var annar hópur mótmælenda sem kom sér fyrir við fiskmarkað bæjarins.
Þegar blaðamenn mættu til Boulogne-sur-Mer, sem er stærsti fiskvinnslubær í Evrópu, voru engir breskir vörubílar á svæðinu. Talið er að þeir hafi breytt leið sinni er fréttist af fyrirhuguðum aðgerðum sjómannanna.
Fjöldi breskra fiskiskipa sem veiða í breskum sjó er gerður út af hollenskum fyrirtækjum og landa þau oft breskum fiski í Frakklandi. Þessum skipum var beint til hafna í Belgíu.
„Aðgerðin í nótt var viðvörunarskot,“ segir Olivier Lepretre, formaður stéttarfélags sjómanna á svæðinu, CRPMEM. Boðar hann frekari aðgerðir ef ekki fari að berast fregnir af lausn á vandanum. Þá segir Lepretre bresk stjórnvöld aðeins hafa veitt 22 fiskiskipum veiðileyfi af þeim 120 sem hafa sóst eftir því að veiða á miðunum sem eru sex til tólf mílur undan ströndum Bretlands.
Bæjarstjórinn í Boulogne-sur-Mer, Frederic Cuvillier, styður baráttu sjómannana og segir Evrópusambandið þurfa að vakna og vernda evrópska sjávarútveginn gegn áhrifum Brexit. „Hinn grimmi sannleikur er að þar er enginn fiskveiðisamningur,“ segir Cuvillier sem er fyrrverandi sjávarútvegsráðherra.
Framteljendur skili sem fyrst
Óskýr ákvæði um kílómetragjald í landbúnaði
Solaris-kæran aftur á borð lögreglunnar
„Gagnrýnin er í raun að beinast að röngum aðila“
Betri yfirsýn með hverjum klukkutíma sem líður
Segir sjúkraflug á Húsavík í uppnámi
Ásthildur: „Ég hljóp á mig“
Brakar minna í Reykjanestá