Vinnslustöðin í Vestmannaeyjum hefur áhuga á að láta smíða ný umhverfisvænni skip til veiða við suðurströndina í stað þriggja sem félagið gerir út. Togaran Brynjólf VE-3 sem smíðaður var 1987, togaran Drangavík VE-80 smíðaur 1991 og nóta- og netabátinn Kap II sem var smíðaður 1967. Ákvæði laga eru hins vegar sögð hindra framgang áformanna.

Þetta sagði Guðmundur Örn Gunnarsson, stjórnarformaður Vinnslustöðvarinnar, á aðalfundi félagsins sem haldinn var á miðvikudag. Í færslu á vef félagsins um fundinn segir að það sé vilji stjórnar og stjórnenda að „nýju skipin verði hönnuð og smíðuð með mikinn orkusparnað í huga og markmið um orkuskipti í sjávarútvegi og græn viðhorf í loftslagsmálum að leiðarljósi. Miðað er við að skipin geti gengið fyrir „græna eldsneytinu“ metanóli.“

Brynjólfur VE var smíðaður 1987 og er eitt þeirra skipa sem Vinnslustöðin hefur hyggju á að skipta út. Ljósmynd/Vigfús Markússon

Þessi áform eru þó háð því að að ákvæðum laga um fiskveiðar verði breytt þannig að heimilt verði að stunda veiðar á skipum af þessum toga. „Ákvæði í gildandi lögum um fiskveiðar í landhelgi Íslands koma í veg fyrir að við getum að þessu leyti tekið stjórnvöld landsins á orðinu um orkuskipti í sjávarútvegvegi og stuðlað að því að ná markmiðum um orkusparnað. Lagaákvæði um svokallaðan aflvísi eru með öðrum hindrun í vegi orkuskipta í sjávarútvegi og grænnar þróunar, það er að segja lögfestar reikniformúlur um vélarafl og þvermál skrúfu fyrir togskip að hámarki 29 eða 42 metrar að lengd til veiða í landhelginni,“ sagði Guðmundur Arnar á fundinum.

Kvaðst hann einnig gera ráð fyrir að Alþingi „bregðist við kallinu“ og geri viðeigandi breytingar á lögum þannig að stuðla megi að umhverfisvænni sjávarútvegi.

Nýtt hús undir botnfiskvinnslu

Auk áforma um ný skip er hafinn undirbúningur að því að reisa nýtt hús undir botnfiskvinnslu Vinnslustöðvarinnar. „Innan fárra vikna liggja fyrir frumhugmyndir að hönnun, skipulagi og sjálfum framkvæmdunum. Gömul hús verða rifin og ný byggð í áföngum svo unnt verði að halda fiskvinnslu gangandi allan tímann,“ segir í færslunni.

Á aðalfundi félagsins var einnig kynntur ársreikningur samstæðunnar og var afkoman sú besta í sögu félagsins.

Frétt af mbl.is

Besta afkoma í sögu Vinnslustöðvarinnar

Tengdar fréttir

Endurnýjun skipaflotans

Gáttaðir á því hvað Hulda er gott sjóskip

• Nýr Hákon stórglæsilegur
• Hulda Björnsdóttir GK-11 á heimleið
• Sigurbjörg nýtur sólarinnar á Jónahafi
• Unnið hörðum höndum í nýjum Hákoni

» Fleiri tengdar fréttir

Vinnslustöðin

Munu sækja verðmæti úr frárennsli vinnslunnar

• Nýbygging Vinnslustöðvarinnar á áætlun
• Sömdu um sjálfvirkt flutningskerfi í nýjan togbát
• Ætla að smíða tvö ný fiskiskip
• Greiða 900 milljónir í arð eftir góða afkomu

» Fleiri tengdar fréttir