Skipstjórinn kvíðir nýju fiskveiðiári
Setja bókamerki
Árni Gunnólfsson, skipstjóri á frystitogaranum Vigra RE, kveðst kvíða nýju fiskveiðiári og telur skerðingu í kvóta torvelda veiðar þegar líða fer á vorið 2023. Vigri RE kom með fullfermi til hafnar í Reykjavík aðfaranótt laugardags eftir tæplega mánaðarlangan veiðitúr.
„Ég verð að segja alveg eins og er. Ég kvíði nýju fiskveiðiári. Það er alls staðar mikið af gullkarfa, ýsu og þorski. Í stað þess að auka við er kvótinn skertur og það stefnir í stórkostleg vandræði þegar kemur fram á næsta vor,” segir skipstjórinn Árni í færslu á vef Brims hf., sem gerir Vigra út.
Krökkt af ýsu
Árni segir aflabrögðin á túrnum sem var að ljúka hafa verið ágæt, en viðurkennir að leita hefur þurft að ufsanum. „Þótt hann sé vandfundinn þá er um fjórðungur aflans ufsi.”
Leitin að ufsanum byrjaði á suðasuturmiðum að sögn skipstjórans.
„Þarna er ekkert um togara og það tók okkur ekki langan tíma að komast að því; hvers vegna? Það er allt krökkt af ýsu fyrir austan og reyndar við alla suðurströndina. Við fórum því á Vestfjarðamið til að leita af ufsa á Halanum. Þar var aðallega karfi og einnig ýsa en við fengum þó dálítið af ufsa.“
Vigri hélt því næst á Fjöllin út af Reykjanesi þar sem reynt var við ufsa á nýjan leik. ,,Alls staðar var nóg af fiski, jafnt fyrir norðan sem sunnan, en gallinn var bara sá að það var of lítið af því sem við leituðum að. Við fengum samt tvo þokkalega daga með ufsaveiði á Fjöllunum en annars var bara karfi og ýsa í boði. Við enduðum svo í Skerjadjúpi og á Matthildi og þar var aflinn djúpkarfi og gulllax.”
Árni vekur athygli á hve ýsustofninn hefur stækkað. „Það eru ekki mörg ár síðan menn biðu spenntir á línunni eftir að ýsuhólfið fyrir norðan væri opnað fyrir veiðum. Þar sést ekki skip í dag og menn sneiða hjá ýsuhólfum fyrri tíma sem og ýsunni sem er alls staðar.”
Oddviti Suðurkjördæmis aldrei búið í Suðurkjördæmi
Ökumaðurinn ákærður fyrir manndráp af gáleysi
/frimg/1/54/4/1540428.jpg)
Dýr er dropinn og 53% fara til ríkisins
Íslensk fjölskylda í LA: „Algjört neyðarástand“
Engar vísbendingar um að kvika sé á leiðinni upp
Til greina kemur að flýta flokksþingi
Myndskeið: „Engin leið“ að ná tökum á eldunum