Vinnslustöðin með nýtt dótturfélag í Finnlandi
Setja bókamerki
/frimg/1/55/51/1555132.jpg)
Vinnslustöðin hf. heldur áfram að færa út kvíarnar og hefur stofnað nýtt dótturfélag í Finnlandi með aðsetur í höfuðborg landsins, Helsinki. Stofnun félagsins kemur eftir nokkuð langt skeið þar sem útgerðarfélagið hefur fest kaup á fleiri útgerðarfélögum og aflaheimildum.
Nýja dótturfélagið ber nafnið VSV Finland OY og hafa verið ráðnir til starfa finnskir starfsmenn með reynslu og þekkingu á sviði innflutnings á eldislaxi og markaðssetningu, sölu og dreifingu laxins í Finnlandi og í Eystrasaltsríkjunum.
Þetta kemur fram í tilkynningu á vef Vinnslustöðvarinnar. Þar segir að Mika Jaaskelainen hafi tekið til starfa sem framkvæmdastjóri VSV Finland Oy en hann gegndi áður stöðu framkvæmdastjóra hjá Kalatukku E. Eriksson sem sérhæfir sig í sölu sjávarafurða í Finnlandi.
„Meginverkefni VSV Finland verður að flytja inn fisk og sjávarfang frá Íslandi og öðrum norrænum ríkjum til sölu og dreifingar í Finnlandi og á öðrum mörkuðum í Evrópu,“ segir í tilkynningunni.
Norskur eldislax
Haft er eftir Sigurgeiri Brynjari Kristgeirssyni (Binna), framkvæmdastjóra Vinnslustöðvarinnar, í tilkynningunni að eitt af verkefnum dótturfélagsins verði að kaupa norskan eldislax til sölu í Finnlandi og í Eystrasaltsríkjunum. „Þarna eru vissulega nýir snertifletir sem okkur þykir mjög áhugavert að vinna með og augljóslega eru miklir möguleikar í laxeldinu, atvinnugrein sem er alls staðar í mikilli sókn og örum vexti.“
„Sérlega ánægjulegt og áhugavert er svo það að við finnum fyrir miklum áhuga í Finnlandi fyrir samstarfi við að kaupa og selja fisk. Það þykir mikill fengur að því að fá öflugt íslenskt sjávarútvegsfyrirtæki inn á finnskan markað með þessum hætti,“ segir Binni.
Töluverð kaup
Undanfarin misseri hefur rekstur Vinnslustöðvarinnar tekið þó nokkrum breytingum. Nýverið var sagt frá því að stjórn félagsins hefði undirritað samning um kaup Vinnslustöðvarinnar á öllu hlutafé í sjávarútvegsfyrirtækjunum Ósi ehf. og Leo Seafood ehf. í Vestmannaeyjum. Kaupunum fylgdi meðal annars Þórunn Sveinsdóttir VE-401 og tilheyrandi aflaheimildir, um 4.000 þorskígildistonn.
Í júní síðastliðnum var tilkynnt um að Vinnslustöðin hefði fest kaup á norska uppsjávarskipinu Gardar og hefur skipið fengið nafnið Gullberg. Skipið hét um tíma Margrét EA og var gert út af Samherja, en síðar Beitir NK og gert út af Síldarvinnslunni.
Þá festi Vinnslustöðin kaup á 75% hlut í fiskvinnslufyrirtækinu Hólmaskeri ehf. í Hafnarfirði í nóvember á síðasta ári. Fyrirtækið sérhæfir sig í handflökun ýsu sem er fryst og seld til austurstrandar Bandaríkjanna.
Fyrri hluta síðasta árs var gengið frá samningi um kaup á 52% hlut í útgerðarfélaginu Hugin ehf. sem gerir út Huginn VE. Fyrir viðskiptin átti Vinnslustöðin 48% hlut í útgerðinni.
Samþykkja að láta af loftárásum á orkuinnviði
Kynna breytingar á stuðningi við Grindvíkinga
Dregið úr stuðningi og sjónum beint að mestu neyðinni
Lögregla heldur spilunum þétt að sér
Mistök við matið
Tölvupóstsamskipti sýna fram á ósamræmi
Stýrivextir lækkaðir um 0,25 prósentustig