Alls greiddu íslensk útgerðarfyrirtæki 628,5 milljónir króna í veiðigjöld í janúar síðastliðnum, að því er fram kemur í Morgunblaðinu í dag og er vísað í sundurliðun veiðigjalda á vef Fiskistofu.

Á Radarnum, mælaborði sjávarútvegsins sem Samtök fyrirtækja í sjávarútvegi halda úti, er vakin athygli á að í janúar hafi tekjur ríkissjóðs af veiðigjöldum verið 70% hærri en í sama mánuði árið á undan þegar þær námu 371 milljón króna.

Samanlagt greiddu þær tíu útgerðir sem greiddu mest 376,4 milljónir króna eða um 60% allra greiddra veiðigjalda. Þær tuttugu sem greiddu mest skiluðu 505,5 milljónum í ríkissjóð sem er 80% allra greiddra veiðigjalda í janúar.

„Forsendur þeirrar skattheimtu sem felst í veiðigjaldinu eru ekki flóknar. Forsendurnar byggjast hins vegar á afkomu í fiskveiðum, sem getur verið afar sveiflukennd á milli ára, enda fjölmörgum óvissuþáttum háð, allt frá duttlungum náttúrunnar til pólitískrar áhættu í fjarlægum löndum. Í kringum 20 fisktegundir bera veiðigjald ár hvert og er gjaldið reiknað sérstaklega fyrir hverja þeirra. Þar getur þróunin á milli ára verið æði misjöfn, meðal annars vegna markaðsaðstæðna sem geta verið afar mismunandi á milli tegunda. Í stuttu máli má segja að veiðigjald nemi um 33% af afkomu fiskveiða, sem reiknað er til krónu á kílógramm landaðs óslægðs afla,“ segir á Radarnum.

Tengdar fréttir

Veiðigjöld

Óásættanlegt að taka atvinnu af öðrum

• Veiðigald á makríl hækkaði um 483%
• Dregur í efa sjálfbærni sjávarútvegsins
• Binda enda á 63 ára útgerðarsögu
• Rétt að gjalda varhug við strandveiðum

» Fleiri tengdar fréttir