Guðlaugur Birgisson, formaður Félags smábátaeigenda á Austurlandi, tekur brosandi á móti blaðamanni á bryggjunni á Djúpavogi. Hann hefur ástæðu til að brosa enda gaf fiskveiðiárið 2022/2023 vel.

„Það hefur sjaldan gengið betur. Meðaltúrinn hjá okkur á síðasta kvótaári var um 11 tonn miðað við venjulega lögn, 18 þúsund krókar. Það er mjög flottur fiskur hérna og þetta var langhæsta meðalveiði sem við höfum verið með. Þetta eru mjög fengsæl mið hérna. Mér heyrist það vera það sama í gangi núna og jafnvel betra þetta haust en síðasta haust. Það lítur út fyrir að þetta kvótaár verði þokkalegt hjá okkur, við erum bjartsýn,“ segir hann í viðtali sem birt var í Morgunblaðinu í dag.

Um borð í línubátnum Öðlingi SU-19 útskýrir hann hve gott er að gera út á handfæri og línu frá Djúpavogi. „Við höfum í um átta eða níu mánuði á ári mjög stóran þorsk og þegar hann er hættur að bíta á línuna þá byrjar hann að bíta á handfærin. Það passar akkúrat að reka þetta saman, línu og handfæri.“

Strandveiðarnar hafa stutt við smábátaútgerð á Austfjörðum. mbl.is/Helgi Bjarnason

Guðlaugur fullyrðir að þegar strandveiðum var komið á hafi það stutt vel við útgerð á svæðinu. „Þetta hjálpaði rosalega mörgum, gerði þetta fýsilegri veiðar fyrir alla. Á suðurfjörðunum er síðan hægt að róa á ufsa og hægt að gera það eftir strandveiðar ef menn hafa áhuga.“

Guðlaugur bendir hins vegar á að það er ekki sömu sögu að segja af stöðunni á norðursvæði Félags smábátaeigenda á Austurlandi. „Það fór illa með okkur þegar svæðisskipting [strandveiðanna] var afnumin. Ég held að veiðarnar hafi minnkað um þriðjung frá ’21. Aflinn hefur farið úr tvö þúsund tonnum niður í 1.200. Það er helvíti mikið.“

Telur hann tilefni til að gera umbætur á strandveiðikerfinu og bendir meðal annars á að tryggja öllum bátum 48 veiðidaga svo hægt verði að stunda veiðarnar á hagkvæmari hátt.

Ufsinn ónýtt auðlind

Borið hefur á því að mörgum hefur gengið fremur illa að ná ufsa og var töluvert eftir af aflaheimildum í tegundinni við lok fiskveiðiársins 2022/2023. Spurður hvort það sé erfitt að gera út á ufsann svarar Guðlaugur brosandi: „Ja, það eru nú ekki allir sem kunna að veiða hann. Það er ekkert sem maður lærir á einum degi, það er bara þannig. Þetta er kúnst.“

Hvert er leyndarmálið sem skilar árangri í ufsaveiðum?

„Það er nú atvinnuleyndarmál,“ svarar Guðlaugur og skellir upp úr. „Nei, nei, það eru bara fá svæði sem gefa hann og svo er það þetta að ná honum upp úr sjó, það er ekki sjálfgefið. Það er ekki alltaf sem það tekst en þegar það tekst þá ertu í góðum málum. Ufsakvótinn brennur inni ár eftir ár, alveg óhemjumiklar heimildir. Þetta er auðvitað frábært fyrir smábáta, það ætti bara að siga flotanum á þetta. Þetta er flökkustofn sem er ónýtt auðlind á Íslandi og er mest nýtt í tegundatilfærslur og brask.“

Viðtalið við Guðlaug má lesa í heild sinni í Morgunblaðinu.

Tengdar fréttir

Smábátaveiðar

Góð aflabrögð hjá bátunum á Suðureyri

• Lýsa áhyggjum af línuívilnun
• Bjóða milljarð í þorskkvóta
• Aðalfundur LS haldinn í fertugasta sinn
• Strandveiðiflotinn skilaði 5 milljörðum króna

» Fleiri tengdar fréttir

Fólkið í sjávarútvegi

Lenti aldrei í alvarlegum óhöppum

• „Auðvitað fylgir því ákveðinn söknuður“
• Feðgar saman í Grænlandstúr á jólum
• Jón stundar nýsköpun í hákarlaverkun
• Fangar sjómennskuna á filmu

» Fleiri tengdar fréttir