Sam­komu­lag hef­ur náðst milli strand­ríkj­anna svo­kölluðu, Íslands, Græn­lands, Fær­eyja, Bret­lands, Nor­egs og Evr­ópu­sam­bands­ins, um að út­hlut­un veiðiheim­ilda í mak­ríl fyr­ir árið 2024 skuli byggja á vís­inda­legri ráðgjöf Alþjóðahaf­rann­sókn­aráðsins (ICES) sem seg­ir að ekki skuli veiða meira en 739.386 tonn. Um er að ræða 5% sam­drátt frá síðustu mak­ríl­vertíð.

Þetta kem­ur fram í til­kynn­ingu á vef norska stjórn­ar­ráðsins.

Vert er að geta þess að sam­komu­lag um að byggja á ráðgjöf ICES um há­marks­afla hef­ur náðst á hverju ári í ár­araðir, það þýðir þó ekki að sam­komu­lag sé um skipt­ingu afl­ans og því út­hluta strand­rík­in afla­heim­ild­ir til fiski­skipa sinna sjálf­stætt í sam­ræmi við þá hlut­deild sem rík­in telja sig eiga til­kall til. Vegna þessa er veitt um­fram ráðgjöf á ári hverju.

Í til­kynn­ing­unni vekja norsk stjórn­völd at­hygli á því að það sé mat vís­inda­manna að strand­rík­in þurfa að veiða minna. Ekki er þó sagt frá því að Norðmenn hafi ásamt Fær­ey­ing­um stór­aukið út­hlut­un mak­ríl­kvóta til skipa sinna, heil 55%.

Vegna fram­gangs Norðmanna og Fær­ey­inga kölluðu sam­tök evr­ópskra út­gerða, Europeche, eft­ir því að fram­kvæmda­stjórn Evr­ópu­sam­bands­ins myndi grípa til aðgerða.

Frétt af mbl.is

Vilja viðskiptaaðgerðir gegn Nor­egi og Fær­eyj­um

Frum­leg rétt­læt­ing

Norðmenn hafa reynt að rétt­læta aukna hlut­deild í mak­ríl með því að leggja til grunns kenn­ing­ar um hve langa viðveru mak­ríll­inn er með í norskri efna­hagslög­sögu. Er þetta nefnt svæðisteng­ing stofns­ins.

„Mak­ríl­stofn­inn er einn verðmæt­asti fiski­stofn Evr­ópu og því er líka krefj­andi að koma sér sam­an um hvernig heild­arkvót­an­um skuli skipt á milli aðila. Að mati Nor­egs er mik­il­vægt að end­an­leg lausn sé í sam­ræmi við hversu mikið af mak­ríl er í raun og veru að finna í þess­um mis­mun­andi efna­hagslög­sög­um,“ er haft eft­ir Cecilie Myr­seth, nýj­um sjáv­ar­út­vegs- og hafs­málaráðherra Nor­egs.

Íslend­ing­ar hafa hafnað þess­um rök­semd­um Norðmanna og bent á að aðferðin sé með inn­byggða galla þar sem ekki er hægt með óyggj­andi hætti að staðsetja stofn­inn á hverj­um tíma. Auk þess er ekki tekið til­lit til þess hvar stofn­ar hrygna, vaxa, leita ætis og þyngj­ast. Svæðisteng­ing­in taki því ekki mið af því hvert fram­lag hvers rík­is er til heil­brigðis stofns­ins.

Frétt af mbl.is

Seg­ir Norðmenn bera mesta ábyrgð á of­veiði

Hóta aðgerðum

Ný­verið ít­rekuðu sam­tök stórra kaup­enda upp­sjáv­ar­af­urða að aðeins eitt ár er eft­ir af þeim fresti sem gef­inn var til að ganga frá samn­ing­um um veiðarn­ar og tryggja að þær yrðu inn­an ráðgjöf vís­inda­manna. Ella hyggj­ast kaup­end­urn­ir leita annarra afurða.

Fátt bend­ir til að sátt ná­ist um skipt­ingu afl­ans milli ríkj­anna þar sem þau viður­kenna ekki aðferðafræði hvors ann­ars og þar með ekki rök­semda­færsl­ur sem þau leggja fram.

Frétt af mbl.is

Segja nóg komið og hóta aðgerðum

Tengd­ar frétt­ir

Mak­ríl­veiðar

Mak­ríl­vertíðin haf­in og stemn­ing­in góð

• Mót­mæla sniðgöngu og segja aðra bera sök
• Mæla gegn neyslu mak­ríls
• Norðmenn sæta harðri gagn­rýni í Evr­ópu
• 130 þúsund tonna upp­hafskvóti í mak­ríl

» Fleiri tengd­ar frétt­ir

• Blogga um frétt