Margir bíða spenntir eftir jólasíldinni
Setja bókamerki
Unnið hefur verið að því í fiskiðjuveri Síldarvinnslunnar í Neskaupstað að setja jólasíld fyrirtækisins í fötur. Fullyrt er á Facebooksíðu útgerðarinnar að „margir bíða spenntir eftir síldinni og telja hana ómissandi hluta jólahátíðarinnar.“
„Síldarvinnslusíldin þykir sú besta og fá allir, sem starfa hjá fyrirtækinu eða tengjast því, vatn í munninn þegar á hana er minnst. Síldin er framleidd eftir kúnstarinnar reglum og er farið eftir uppskrift sem hefur verið þróuð í áratugi. Framleiðsluferillinn er ekki gefinn nákvæmlega upp en unnt er að greina frá ýmsum þáttum hans,“ segir í færslunni.
Eina sem fæst uppgefið er að notuð er nýveidd norsk-íslensk gæðasíld til framleiðslunnar og er hún flökuð og skorin í bita. Bitarnir eru síðan látnir liggja í saltpækli í ákveðinn tíma og síðan í pækli með tilteknu magni af ediksýru. Að lokum er síldin sett í fötur og fara ýmsar kryddjurtir með í föturnar sem sjá um að framkalla hið himneska bragð.
„Það er ávallt ákveðin stemmning hjá starfsfólki fiskiðjuversins þegar unnið er við jólasíldina og oft spyr fólk, sem getur vart beðið eftir hnossgætinu, um framleiðsluna. Ár eftir ár heyrist að síldin hafi aldrei verið betri og sýnir það að ávallt er verið að fullkomna framleiðsluna og gera hana ómótstæðilegri. Heyrst hefur að í ár sé jólasíldin einstakt ljúfmeti og er hún í reynd lokaþátturinn á afar vel heppnaðri síldarvertíð,“ segir í færslunni.
Auk starfsmanna og einstaklinga sem tengjast Síldarvinnslunni er líknarfélaginu Hosurnar einnig veitt ákveðið magn sem félagið selur, en Hosurnar er líknarfélag starfsmanna Fjórðungssjúkrahússins í Neskaupstað.
Stoltir prjónakarlar reynslunni ríkari
Telur þöggun ríkja um vindmylluáform í Garpsdal
Ólíkar skoðanir á beitingu ákvæðisins
Létu vinna minnisblað um ákvæðið fyrir tveimur mánuðum
Öllum ljóst að þetta gæti orðið niðurstaðan
Enginn slasaður eftir byssuskotið