Árið 2024 hefur farið vel af stað hjá útgerð Karls Sveinssonar á Borgarfirði eystri. Aflabrögðin hafa verið góð og stór þorskur enn á miðunum, og tengist það líklega stöðvun togaraveiða innan 12 mílna að sögn hans.

„Árið hefur nú oft byrjað verr. Vel hefur gengið í janúar en það hefur verið bræla í að verða hálfan mánuð, en það hefur komið fyrir undanfarna vetur að við höfum ekki komist á sjó í sex vikur. Nú hefur oftast verið hægt að róa í hverri viku,“ segir Karl í viðtali í febrúarblaði 200 mílna. Hann gerir út línubátana Tona NS-20 og Emil NS-5.

Fisverkun Kalla Sveins á Borgarfirði eystri.

Vetrarvertíðin er þó aðeins óvanaleg að þessu sinni þar sem hefðbundið er að stóri þorskurinn, fiskur sem er átta kíló eða stærri, hverfur af miðunum í enda október eða byrjun nóvember. „Núna eru um 20 til 30 prósent af fiskinum átta kíló eða stærri. Það er mjög óvanalegt að stóri fiskurinn skuli ekki yfirgefa okkur og eins líka ýsan, því það eru ekki ægilega mörg ár síðan hún hvarf við áramótin og sást ekki fyrr en um sumar.“

Hvað ætli skýri það að fiskurinn er enn á miðunum?

„Það gæti verið að það sé eitthvað með sjávarhita sem ræður því, en svo skulum við ekki gleyma því að okkur tókst að loka Skápnum – það var opið hérna inn á sex mílur fyrir togaraskrattana. Þetta er tvímælalaust að skila sér, það er ekki nokkur vafi á því. Þeir voru hérna skarkandi alveg á sex mílur austur úr Glettingi og norður á Flóa, en nú eru þetta 12 mílur og það munar um það að friða svæðið fyrir innan,“ svarar Karl.

Viðtalið við Karl má lesa í heild sinni í síðasta blaði 200 mílna.

Tengdar fréttir

Smábátaveiðar

Góð aflabrögð hjá bátunum á Suðureyri

• Lýsa áhyggjum af línuívilnun
• Bjóða milljarð í þorskkvóta
• Aðalfundur LS haldinn í fertugasta sinn
• Strandveiðiflotinn skilaði 5 milljörðum króna

» Fleiri tengdar fréttir