Meirihluti H-lista í Langanesbyggð virðast hafa klofnað á sveitarstjórnarfundi í gær í afstöðu til vinnsluskyldu grásleppuafla sem landað er í sveitarfélaginu á grundvelli veiðiheimilda sem fást gegnum byggðakvóta.

Fyrir sveitarstjórn lágu tvær tillögur, önnur frá H-lista sem er í fjögurra manna meirihluta og hin frá L-lista sem er í þriggja manna minnihluta. Báðar tillögurnar féllu á jöfnu.

Þorsteinn Ægir Egilsson, fulltrúi L-listans, tók til máls á fundinum og benti á að engin fiskvinnsla hafi keypt grásleppu til vinnslu í sveitarfélaginu á síðasta fiskveiðiári. Auk þess væri ekkert sem benti til þess að breyting yrði þar á. „Fjölmargir kvótalitlir eða lausir grásleppubátar höfðu nýtt grásleppu sem mótframlag til byggðakvóta fram að því og vilja fulltrúar L-lista styðja við bakið á hnignandi smábátaútgerð,“ sagði hann.

Var lagt til að grásleppa sem landað er í sveitarfélaginu yrði undanþegin vinnsluskyldu, þannig yrði ekki krafist vinnslusamnings vegna þeirrar tegundar og að vigtun til byggðakvóta á hafnarvog í Langanesbyggð yrði metin nægjanleg til að uppfylla skilyrði gildandi reglugerðar um vinnsluskyldu.

Grásleppan er víða mikilvæg tekjulind fyrir smábátaútgerðir. mbl.is/Líney sigurðardóttir

Báðar felldar á jöfnu

Tillagan var hins vegar felld á jöfnu er þrír fulltrúar minnihlutans kusu með tillögunni, þrír fulltrúar meirihlutans kusu gegn henni en fjórði fulltrúi meirihlutans Helga G. Henrýsdóttir sat hjá.

Var því næst borin upp tillaga meirihlutans (H-lista): „Sveitarstjórn mun ekki leggja til frekari breytingar á reglum um byggðakvóta. En hvetur bréfritara til að beita sér í þágu þess að vinnsla á grásleppu verði til staðar í byggðarlaginu. Jafnframt felur sveitarstjórn, sveitarstjóra að boða til opins umræðufundar um byggðakvóta í október næstkomandi, með sveitarstjórn til að ræða tillögur komandi fiskveiðiárs.“

Var þessi tillaga einnig felld á jöfnu er þrír fulltrúar meirihlutans greiddu atkvæði með tillögunni en fjórði fulltrúi meirihlutans sat aftur hjá, á meðan greiddu fulltrúar minnihlutans gegn tillögunni.

Ákveðið var að fresta málinu til næsta sveitarstjórnarfundar.

Tengdar fréttir

Grásleppuveiðar

Sakar Þórarin Inga um brot á siðareglum

• Álag á starfsfólki vegna grásleppukvóta
• Þó nokkur munur á kvóta og fjölda báta
• Þrjár útgerðir umfram hámark í grásleppu
• Yfir 100 skip fá ekki grásleppukvóta

» Fleiri tengdar fréttir

• Blogga um frétt