Togurum fækkaði um þrjá
Setja bókamerki
Fiskiskipaflotinn taldi 1.535 fiskiskip við árslok 2023 og eru það fimm færri en í árslok 2022. Fækkaði togurum sem skráðir eru hjá Samgöngustofu um þrjá milli áranna 2022 og 2023 og vélskipum fækkaði um sjö, en opnum bátum fjölgaði hins vegar um fimm.
Hlutfallslega hefur togurum fækkað mest á undanförnum árum og voru þeir 51 við árslok 2013 en 73 við árslok 2003. Þannig hefur þeim fækkað um 23,5% á áratug og 46,5% á tveimur áratugum. Á einum áratug hefur vélskipum fækkað um 13% og 22% á tveimur áratugum og opnum bátum hefur fækkað um 5% á áratug og 12% frá árslokum 2003.
Opnum fiskibátum tók að fjölga eftir bankahrun þegar strandveiðikerfinu var komið á og hefur fjöldi slíkra báta ekki farið undir átta hundruð síðan árið 2010.
Togarar voru með lægsta meðalaldur eftir tegundaflokkum fiskiskipa við lok síðasta árs. Var meðalaldur þeirra 21 ár, en meðalaldur togara var 22 ár við árslok 2022. Þá hefur meðalaldur togara verið á þessu bili frá árinu 2018.
Nýrri skip fara létt með að veiða meiri afla en þau eldri og því má ætla að fækkun togara síðustu ár hafi verið afleiðing þess að mikil endurnýjun hefur átt sér stað í togaraflotanum.
Dregið úr endurnýjun vélskipa
Meðalaldur vélskipa hefur hækkað jafnt og þétt undanfarin ár og náði hann 29 árum 2022 og hélst þar til ársloka 2023. Meðalaldur þessara skipa hélst í kringum tvo áratugi upp úr aldamótum en breyting varð þar á í kringum 2010 til 2012. Tíðni í endurnýjun þessara skipa fór að dragast saman fyrir um áratug en undanfarin ár hefur verið áberandi að rekstrargrundvöllur „stórra smábáta“, sem sagt línubáta, hefur verið töluvert meiri en stærri línuskipa. Geta línubátarnir með fjögurra til fimm manna áhöfn skilað jafn miklum afla og línuskip með tíu til fimmtán manna áhöfn.
Meðalaldur smærri báta eða opinna fiskiskipa var 35 ár í árslok 2023 og hefur aldur þessara báta hækkað nánast stöðugt í tvo áratugi. Athygli vekur að þrátt fyrir öra fjölgun slíkra báta frá árinu 2008 til 2013 hækkaði meðalaldurinn úr 22 árum í 26 ár.
Lækka verðið um nokkrar milljónir
Átta utanríkisráðherrar fordæma hernám Gasa
Það eru svo mikil verðmæti í ást
Lausn gíslanna skilyrðislaus krafa
Þóknunin um 18% og hótelin borga milljarða
Eigandi Ölvers: „Hressir Danir í fullkomnu rugli“
Gat alltaf stólað á mömmu