Mannbjörg varð þegar strandveiðibátur sökk norðvestur af Garðskaga á þriðja tímanum í nótt. Stjórnstöð Landhelgisgæslunnar barst neyðarkall frá skipstjóra annars strandveiðibáts klukkan 2.42 þess efnis að bátur í grenndinni væri að sökkva um sex sjómílur norðvestur af Garðskagavita.

Þyrlusveit Landhelgisgæslunnar var þegar í stað kölluð út á hæsta forgangi ásamt sjóbjörgunarsveitum Slysavarnafélagsins Landsbjargar á Suðurnesjum. Þá voru nálæg fiskiskip og bátar beðin um að halda á staðinn, að því er segir í tilkynningu.

Ljósmynd/Áhöfnin á Hannesi Þ. Hafstein

Skömmu eftir að neyðarkallið barst Gæslunni hafði tilkynnandi aftur samband og sagði varðstjórum í stjórnstöð að hann væri búinn að bjarga manninum úr sjónum en bátsverjanum tókst að komast í björgunargalla áður en bátur hans sökk.

Maðurinn var kaldur eftir veruna í sjónum og var ákveðið að sjúkrabíll biði hans á bryggjunni í Sandgerði. Sá sem bjargaði manninum sigldi með hann þangað. Báturinn marar í hálfu kafi og munu sjóbjörgunarsveitir Landsbjargar freista þess að draga hann til hafnar.

Ljósmynd/Áhöfnin á Hannesi Þ. Hafstein

„Landhelgisgæslan vill koma á framfæri sérstökum þökkum til skipstjóra strandveiðibátsins sem sýndi mikið snarræði við björgun mannsins og einnig til annarra viðbragðaðila sem brugðust við með skjótum og fumlausum hætti,” segir í tilkynningunni.

Uppfært kl. 6.28:

Að sögn varðstjóra hjá Landhelgisgæslunni er innan við klukkutími þangað til báturinn verður kominn til hafnar. 

Tengdar fréttir

Sjávarháski við Garðskaga

„Þessi niðurstaða er bara grín“

• Skipverjarnir dæmdir í skilorðsbundið fangelsi
• Rúm vika eftir af farbanni: Ákvörðun brátt tekin
• Rannsókn lögreglu lokið: Óljóst um niðurstöðu
• Rannsókn lögreglu á lokametrum

» Fleiri tengdar fréttir

• Blogga um frétt