„Mér finnst við veiða allt of lítið af þorski. Stjórnvöld þurfa að koma að þessum málum og breyta aflareglunni. Að bjóða okkur upp á 0,9% aukningu er til að æra óstöðugan,“ svarar Örn Pálsson, framkvæmdastjóri Landssambands smábátaeigenda, inntur álits á ráðgjöf Hafrannsóknastofnunar sem kynnt var í dag.

Lagði stofnunin til að ekki yrði veitt meira en 213 þúsund tonn á fiskveiðiárinu 2024/2025 sem er innan við 1% aukning frá síðasta ári.

„Við hefðum viljað sjá þorskinn hækka miklu meira og aflareglan kemur í veg fyrir það. Á meðan stjórnvöld hafa ákveðið að fylgja gildandi aflareglu kemur niðurstaðan ekkert á óvart.“

Frétt af mbl.is

Þorskstofninn fari hægt minnkandi

Örn segir reynslu útgerða um allt land vera að fiskist vel af stæðilegum þorski en Hafrannsóknastofnun taki ekki nógu mikið mark á gangi veiða. „Auðvitað eru allir ánægðir með það hversu gott ástand er á þorskinum og það sést á aflabrögðunum, en aflabrögðin eru ekkert í samræmi við lýsingar Hafrannsóknastofnunar það sjá allir sjómenn. Þegar veiðist minna af ufsa þá virðist stigið á bremsuna og hlustað á sjómenn en annað er uppi á teningnum þegar þorskurinn er annars vegar.“

Þá sé sérstakt áhyggjuefni hve lítið þorskurinn virðist hafa að éta.

„Það finnst miklu minna af loðnu í maganum á þorskinum en verið hefur. Landssambandið varaði við þessum flottrollsveiðum sem voru leyfðar og það er spurning hvort það hafi haft áhrif á hvað finnst lítið af loðnu núna. Hafrannsóknastofnun verður að fara að taka þessu alvarlega því loðnan er mikilvæg undirstaða í fæðunni hjá þorskinum. Nú sjáum við hvað meðalþyngd nokkurra árganga hefur minnkað mikið og miðað við þessa þróun líður ekki langur tími þar til veiðistofninn minnkar.“

Ýsan áfram há

Um aðra stofna segir hann ánægjulegt að ráðgjöf í ýsu helst áfram há þó hann hafi búist við meiri aukningu í ráðgjöfinni. Þá sé einnig gott að sjá að ráðgjöf í ufsa helst nánast óbreytt, að sögn Arnar.

„Það er líka ánægjulegt að sjá þessa aukningu í steinbítnum en verst hvað fæst lágt verð fyrir hann.“

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir

Hafrannsóknastofnun

Héldu í 34 daga uppsjávarleiðangur

• Fátt kom á óvart
• Þorskstofninn fari hægt minnkandi
• Beint: Ráðgjöf Hafrannsóknastofnunar
• Eflingu rannsókna fagnað

» Fleiri tengdar fréttir

• Blogga um frétt