Strandveiðibátar hafa undanfarin tvö ár greitt langtum meira en aðrar útgerðir í gjöld vegna umframafla. Á síðasta fiskveiðiári nam álagning slíkra gjalda rúmlega 100 milljónum króna og mátti rekja um 76% þeirra til strandveiða og 89% þeirra fiskveiðiárið á undan.

Þetta má lesa úr ársskýrslu Fiskistofu 2023 sem birt var nýverið.

Þar sést að á síðasta fiskveiðiári, sem lauk 31. ágúst, greiddu strandveiðibátar rúmlega 76 milljónir króna í sérstakt gjald vegna ólögmæts afla og er með því vísað til afla sem er umfram það hámark sem þeim er heimilt að veiða. Aðrar útgerðir greiddu tæplega 24 milljónir á sama tíma.

Fiskveiðiárið á undan (2021/2022) voru innheimtar tæpar 79 milljónir vegna umframafla strandveiðibáta en aðrar útgerðir um aðeins 9,7 milljónir.

Ekki liggja fyrir nákvæmar skýringar á þessum mikla mun en strandveiðibátar búa við ströng skilyrði um hámarksafla sem viða við afla í hverri löndun og geta strandveiðisjómenn aðeins áætlað magn áður en komið er til hafnar. Hámarksafli annarra útgerða miðar hins vegar við fiskveiðiárið í heild.

Samkvæmt reglugerð um strandveiðar er hverjum strandveiðibáti aðeins heimilt að draga 650 kíló, í þorskígildum talið, af kvótabundnum tegundum, að ufsa undanskildum, í hverri veiðiferð.

Í maí síðastliðnum komu 567 strandveiðibátar með meiri afla að landi en heimild var fyrir, samanlagður umframafli nam 82 tonnum þann mánuðinn.

Frétt af mbl.is

80% strandveiðibáta rukkaðir vegna umframafla

Meira en tvöföld aukning

Athygli vekur að álagning Fiskistofu vegna umframafla vegna annarra veiða á síðasta fiskveiðiári nam 23,9 milljónir króna sem er 145% aukning frá fiskveiðiárinu á undan þegar álagningin var aðeins 9,7 milljónir.

Skýringu á þessari aukningu er ekki að finna í ársskýrslu Fiskistofu en ætla má að mikill samdráttur í aflaheimildum ýmissa tegunda undanfarin ár hafi haft veruleg áhrif í þessu samhengi þar sem óhjákvæmilegt að fleiri tegundir fást sem meðafli annarra veiða. Má benda á veiðibann á djúpkarfa sem dæmi í þessu samhengi.

Tengdar fréttir

Strandveiðar

Aflaheimild aukin um 2 þúsund tonn

• Búnir með 76% strandveiðikvótans
• 80% strandveiðibáta rukkaðir vegna umframafla
• Klæddir sjóstökkum í kröfugöngu
• „Það hefur enginn komist á sjó hérna“

» Fleiri tengdar fréttir

• 1 blogg um fréttina

Bloggað um fréttina

• Arnar Guðmundsson: Sérhönnuð andstyggð