Útflutningur eldisafurða var á miklu flugi í maí og náði útflutningsverðmætið 3,2 milljörðum króna í mánuðinum sem er 80% aukning frá sama mánuði á síðasta ári. Þá er útflutningsverðmæti eldisafurða á fyrstu fimm mánuðum komið í rúmlega 22 milljarða króna, sem er 18% aukning frá sama tímabili 2023 og hefur verðmæti þessara afurða aldrei verið meira á þessum árshluta.

Fjallað er um þetta í nýlegri greiningu Radarsins og er vísað í bráðabirgðatölur Hagstofu Íslands sem birtar voru í síðustu viku.

Mynd/Radarinn

Þá var útflutningsverðmæti eldisafurða ígildi 15% af útflutningsverðmæti sjávarafurða á fyrstu fimm mánuðum ársins og um 6% af vöruútflutnings alls. Þessi hlutföll hafa aldrei verið hærri en nú.

„Í fyrstu bráðabirgðatölum Hagstofunnar er útflutningsverðmæti eldisafurða í heild einungis birt og því liggur ekki fyrir sundurliðun verðmæta niður á einstaka tegundir í maímánuði. Vafalaust má rekja þessa myndarlegu aukningu í maí til laxeldis, líkt og mánuðina á undan. Þannig var útflutningsverðmæti eldislax komið í tæpa 17 milljarða króna á fyrstu 4 mánuðum ársins, sem er um 20% aukning frá sama tímabili í fyrra á föstu gengi. Hlutdeild lax af útflutningsverðmæti eldisafurða í heild var rúm 87% á fyrstu 4 mánuðunum samanborið við rúm 81% á sama tímabili í fyrra,“ segir í greiningu Radarsins.

Mynd/Radarinn

Bent er á að það var verulegur samdráttur í útflutningsverðmæti silungs á tímabilinu og er þar að mestu um að ræða bleikju.

„Þannig nam útflutningsverðmæti silungs tæplega 1,5 milljarði króna á fyrstu 4 mánuðum ársins samanborið við 2,1 milljarð á sama tíma í fyrra. Svipaða sögu er að segja um frjóvguð hrogn, sem er verðmæt hátækniframleiðsla. Útflutningsverðmæti þeirra var komið í tæpar 400 milljónir króna á fyrstu 4 mánuðum ársins, sem er 43% samdráttur á milli ára. Á móti hafa útflutningstekjur af Senegal flúru, sem er einn verðmætasti matfiskur í heimi, aldrei verið meiri á fyrstu 4 mánuðunum og nú í ár. Þannig var útflutningsverðmæti Senegal flúru komið í rúmar 500 milljónir á tilgreindu tímabili, sem er 150% aukning á milli ára á föstu gengi.“

Einnig aukning í sjávarafurðum

ýverið var greint frá því að út­flutn­ings­verðmæti sjáv­ar­af­urða í maí hafi náð 35 millj­örðum króna dem er 3,5% meira en í sama mánuði á síðasta ári í krón­um talið en þar sem lít­il breyt­ing hef­ur verið á gengi krón­unn­ar er aukn­ing­in í er­lendri mynt 4%.

Útflutn­ings­verðmæti sjáv­ar­af­urða á fyrstu fimm mánuðum árs­ins 2024 námu 146 millj­örðum króna sem er 1,5% minna en á sama tíma­bili á síðasta ári að teknu til­liti til geng­is­breyt­inga.

Frétt af mbl.is

Maí góður mánuður fyrir mjöl og lýsi

Tengdar fréttir

Fiskeldi

Laxey komin með rekstrar- og starfsleyfi

• Vonbrigði ef Bjarkey leggur ekki fram lagareldisfrumvarp
• Segir hnignunina ekki tengjast sjókvíaeldi
• „Starfsgreinin hefur fest sig í sessi“
• Alvarleg frávik í eldisstöðinni í Tálknafirði

» Fleiri tengdar fréttir

• Blogga um frétt