Veruleg aukning í ýsu og ufsa í maí

Íslenski fiskiskipaflotinn landaði 87 þúsund tonnum í maí síðastliðnum og er það 14% minn afli en í sama mánuði 2023, að því er fram kemur í samantekt Hagstofu Íslands. Má rekja samdráttinn til uppsjávartegunda en athygli vekur að botnfiskaflinn eykst um 19% og vegur þar þungt veruleg aukning í ufsa, ýsu og karfa.

Í maí var landað 5.260 tonnum af ufsa sem er 48% meira en í sama mánuði í fyrra og var á sama tíma landað rúmlega átta þúsund tonnum af ýsu sem er 46% aukning milli ára. Þá jókst magn af lönduðum karfa um 32% og endaði í 4.199 tonnum. Einnig var góður gangur í flatfiskveiðum og jókst aflinn um 34%.

Í maí var landað tæplega 38 þúsund tonnum af uppsjávarafla sem er 37% minna en á þessu tímabili á síðasta ári. Munar þar langmestu um kolmunnann sem var nánast öll uppistaða uppsjávaraflans í maí í ár og 2023. Samdráttur í kolmunna má líklega rekja til minni veiða í kjölfar einstaklega góðrar vertíðar í vetur.

Heildarafli á tólf mánaða tímabili frá júní 2023 til maí 2024 var rúmlega 1,08 milljón tonn sem var 25% minna en aflinn á sama tólf mánaða tímabili ári fyrr. Munar þar um 400 þúsund tonn af loðnu sem fékkst tímabilið á undan en sem kunnugt er varð loðnubrestur síðastliðinn vetur.

• Blogga um frétt