Gera hlé á sölu meirihluta American Seafoods

Bandaríska útgerðarfélagið American Seafoods Group hefur ákveðið að gera hlé á söluferli meirihluta hlutafjár í fyrirtækinu þar til markaðsaðstæður batna, að því er fram kemur í tilkynningu. Hið bandaríska félag er með umfangsmestu sjóvinnslu alaskaufsa og kyrrahafslýsingi á heimsvísu.

„Við höfum gert hlé á söluferlinu svo við getum haldið áfram að einbeita okkur að rekstrinum okkar og viðskiptavinum,“ er haft eftir Einari Gústafssyni forstjóra American Seafoods í tilkynningunni.

„Reksturinn er enn sterkur og við hlökkum til að taka upp umræðurnar að nýju þegar þjóðhagslegar aðstæður batna og mat á verðmæti okkar er í samræmi við styrk félagsins. Í ljósi þess að horfur benda til mikils vaxtar framundan er American Seafoods ánægt að losna við að hafa þetta hangandi yfir okkur og geta einbeitt okkur aftur að daglegum rekstri,“ segir Einar.

Nokkur vöxtur hefur verið undanfarið hjá félaginu og bættist American Empress II í flota þess á síðasta ári. Í tilkynningunni fullyrðir Einar að fyrirtækið sé reiðubúið til að fullnýta þau tækifæri sem séu í kortunum í tengslum við vaxandi eftirspurn eftir sjávarafurðum á heimsvísu.

Frétt af mbl.is

American Seafoods stækkar flota sinn

Hygðust selja allt í sjávarútvegi

Fyrir um það bil ári tilkynnti fjárfestingafélagið Bregal Partners að það myndi selja alla eignarhluti sem væru í sjóði eitt (Bregal Partners Fund I). Fer sjóðurinn með meirihluta hlutafjár í American Seafoods í Alaska auk þess að fara með hluti í Blue Harvest Fisheries í Massachusetts sem og landeldisfyrirtækinu West Coast Salmon sem vinnur að uppbyggingu laxeldistöðvar í Nevada.

Með ákvörðun American Seafoods um að gera hlé á söluferlinu mun félagið áfram vera í meirihlutaeigu Bregal Partners.

Fréttamiðillinn Seafood Source greindi frá því í maí á síðasta ári að Scott Perekslis, einn af stofnendum Bregal Partners, hefði ákveðið að láta af störfum og að hann væri að skipuleggja kaup á eignarhlutum fjárfestingafélagsins í sjávarútvegsfyrirtækjum.

• Blogga um frétt