Alþjóðahafrannsóknaráðið (ICES) hefur lagt til að ekki verði veitt meira en 19.321 tonn af þorski í Norðursjó, út af Skotlandi og í austanverðu Ermarsundi á næsta ári, er það tæplega 15% minni ráðgjöf en fyrir 2024. Athygli vekur að ráðgjöfin fyrir 2024 er 22.691 tonn en strandríkin hafa samið um veiði á 31.301 tonni.
Ráðgjöfina má finna meðal annars á vef norsku hafrannsóknastofnunarinnar, en þar er einnig að finna ráðgjöf ICES fyrir ýsu á sama svæði og nemur hún 112.435 tonnum fyrir árið 2025, en það er rúmlega 24% samdráttur frá fyrri ráðgjöf. Útgefnar aflaheimildir í ýsu í Norðursjó samkvæmt samkomulagi strandríkjanna fyrir yfirstandandi ár er þó um 30 þúsund tonn minni en ráðgjöfin nam.
Áætlað er að brottkastshlutfall í ýsu í Norðursjó sé 30% og er vísað til þess hve lítið af undirmálsfiski (smáfiski) sé landað þrátt fyrir að löndunarskylda var útvíkkuð árið 2016.
Einnig er lagt til að afli í lýsingi í Norðursjó, Keltahafi og norðurhluta Biskajaflóa dragist saman um rúmlega 20 þúsund tonn og nemur ráðgjöfin fyrir næsta ár 52.466 tonn.
Ekki aðeins samdráttur
Athygli vekur að ráðgjöf ICES fyrir lýsu í Norðursjó og austurhluta Ermarsunds hækkar um 84% milli ára. Lagt er til að hámarksafli á næsta ári verði 237 þúsund tonn en ráðgjöfin fyrir yfirstandandi ár nemur 128 þúsund tonnum.
ICES leggur til að afli í skarkola í Norðursjó og Skagerrak verði ekki meiri en 176.988 tonn á næsta ári, en ráðgjöf fyrir 2024 var 155 þúsund tonn.
Nokkur aukning er einnig í ráðgjöf fyrir ufsa í Norðursjó, á Rockallsvæðinu vestur af Skotlandi, Skagerrak og Kattegat. Lagt er til að hámarksafli verði 79 þúsund tonn árið 2025 á móti tæplega 74 þúsund tonnum á yfirstandandi ári.