Fengu gám frá Eimskip í trollið

Ísfisktogarinn Bergur VE lenti í því í morgun að fá hlut af gám frá Eimskip í trollið. Í samtali við mbl.is segir Jón Valgeirsson, skipstjóri skipsins, að gámurinn hafi komið í trollið þegar þeir voru að toga upp botnvörpu af Pétursey. 

 DV greindi frá því í maí að 15 gámar hefðu fallið útbyrðis af flutningsskipinu Dettifoss vegna „mannlegra mistaka“. Atvikið átti sér stað í mars, austan við Vestmannaeyjar. 

Annað skip lenti í gámnum

Spurður hvort að gámurinn sem þeir fengu í trollið í morgun sé frá þessu atviki segir Jón að það sé afar ólíklegt en að hann geti ekki útilokað það.

„Ég hélt að það hefði verið mikið austar, en ég veit það ekki. Það er svolítið skrýtið að fá upp gám þarna, þetta er á allt öðrum stað. Þetta er svolítið eins og þeir hafi misst annan gám og ekki látið vita,“ segir Jón. 

Hann segir að áhöfnin hafi dregið upp stærstan hluta af hliðum gámsins, en að líklega sé botninn og toppurinn enn á hafsbotninum. Þá segir hann að þeir hafi ekki lent í því að draga gám upp á þessu svæði en að annað skip hafi líklega lent í sama gám fyrir nokkrum mánuðum. 

• Blogga um frétt