„Algjör ófögnuður“

Ísfisktogarinn Bergur VE lenti í því í fyrrinótt að fá hlut af gámi frá Eimskip í trollið þegar hann var á landleið til Vestmannaeyja af Austfjarðamiðum.

Í frétt á vef Síldavinnslunnar segir að ákveðið að hafi verið að taka lokahol túrsins á Pétursey. Þegar trollið var síðan tekið upp kom í ljós að því fylgdu hliðar úr gámi sem augljóslega var kominn frá Eimskip.

Spurður hvort þetta hafi ekki verið óvæntur afli sagði skipstjórinn Jón Valgeirsson:

„Nei, það er varla hægt að segja það. Það eru gámar víða á hafsbotni og ætti ekki að koma neinum á óvart miðað við hvernig skipin sem flytja þá eru hlaðin. Fyrir okkur eru þessir gámar auðvitað algjör ófögnuður.“

Frétt af mbl.is

Fengu gám frá Eimskip í trollið

Hann segir að þetta hafi verið stærsti hlutinn af hliðum gámsins sem kom upp með trollinu en þeir hafi verið heppnir að því leiti að veiðafærið virðist ekki hafa orðið fyrir skemmdum.

Það eru gámar víða á hafsbotni. Ljósmynd/Friðrik Sigmarsson

„Í vor voru fréttir af því að skip hefði misst eina 15 gáma í sjóinn úti fyrir suðurströndinni og voru einhverjir að giska á að þessi gámur væri einn af þeim. Það getur hins vegar ekki verið því skipið missti gámana á Síðugrunni sem er 30 mílum austar en sá staður sem við fengum gámaleifarnar á,“ segir skipstjórinn.

Jón segir að komið hafi verið með leifar gámsins í land þar sem þeim verði fargað.

• Blogga um frétt