Sjávarútvegssýningin hafin í Kópavogi

Bjarkey Olsen Gunnarsdóttir matvælaráðherra setti Íslensku sjávarútvegssýninguna, IceFish, í Kópavogi fyrr í dag. Fjörutíu ár eru liðin frá því að sýningin var fyrst haldin hér á landi.

Í ár mæta rúmlega 400 sýnendur til leiks og koma þeir frá 22 löndum til að sýna allt það nýjasta og besta í sjávarútvegi.

Samkvæmt tilkynningu frá matvælaráðuneytinu gerði ráðherra mikilvægi trausts sjávarútvegs ásamt ábyrgri auðlindanýtingu að umtalsefni í ávarpi sínu.

„Okkur hefur tekist að koma á ágætu jafnvægi á milli nýtingar og verndar fiskistofna. Í sögulegu samhengi er þetta mikilvægt, því að ósjálfbærar veiðar voru stórt vandamál hér á árum áður. Með tilkomu kvótakerfisins náðum við tökum á ofnýtingu fiskistofna hér við land, en óhætt er að segja að við höfum að einhverju leyti tapað trausti almennings með tilkomu framsalsins,“ sagði Bjarkey m.a.

Ráðherra lagði jafnframt áherslu á langtímastefnumótun fyrir sjálfbæran sjávarútveg sem taki mið af umhverfisvernd og hagkvæmri nýtingu auðlinda þar sem tillaga til þingsályktunar um verndun hafsins og frumvarp um verndarsvæði mun spila lykilhlutverk.

Markmið tillögunnar er að vernda 30% hafsvæða innan efnahagslögsögu Íslands fyrir árið 2030, í samræmi við samning Sameinuðu þjóðanna um líffræðilega fjölbreytni.

Bjarkey Olsen Gunnarsdóttir matvælaráðherra flutti ávarp við opnun IceFish í Kópavogi í dag. Ljósmynd/Sigurjón Ragnar

• Blogga um frétt