Sjálfvirk myndgreining afla til að auka skilvirkni í fiskveiðum

Ludvig Ahm Krag, prófessor í nýsköpun veiðarfæra við Danmarks Tekniske Universitet (DTU), kynnti nýtt kerfi í tengslum við þátttöku Hampiðjunnar í Sjávarútvegssýningunni, sem DTU þróaði ásamt samstarfsaðilum. 

Ludvig segir í samtali við mbl. að nýjungin felist í því að greina samsetningu afla sem veiðist í trollið, með því að nota rauntímamyndavélar og myndgreiningu sem nýtir gervigreind til að greina tegundir og stærð fiska. 

Spurður nánar um tæknina segir Ludvig að hún gæti haft mikla þýðingu fyrir veiðistjórnun skipa. 

„Til að byrja með hafa fiskveiðar, þá sérstaklega togveiðar sætt þeirri áskorun hvað varðar meðafla, orkunýtingu og hafsbotnsáhrif. Togveiðar eru í eðli sínu blint ferli, þar sem skip verða að hífa veiðarfærin inn, til þess að ganga í skugga um hvort samsetning aflans sé í samræmi við veiðarnar. Ef of mikið eða lítið er af vissum fisktegundum eru skipin nauðbeygð að fara eitthvert annað,” segir hann.  

Ludvig segir að til þess að laga þetta verði skipstjórar að vera upplýstir í rauntíma hvað sé að gerast á meðan veiðum stendur.  

„Kerfið gerir skipstjórum kleift að taka snöggar ákvarðanir, ef þeir sjá í rauntíma hvaða fisktegundir eru að koma í trollið. Við höfum hannað sérstaka togmyndavél sem er tengd við öflugan ljósleiðarakapal, sem Hampiðjan hannaði. Til þess að veita skipstjórum innsýn í hvað raunverulega sé að gerast á trollinu, varðandi magn og meðafla,” útskýrir Ludvig.  

• Blogga um frétt