Sjálfvirknivæðingin sífellt að verða meiri í sjávarútvegi

Umbúðafyrirtækið Samhentir er eitt þeirra fyrirtækja sem er að kynna þjónustu sína á Sjávarútvegssýningunni að sögn Brynjars Viggóssonar, framkvæmdastjóra sölusviðs, í samtali við mbl. Fyrirtækið þjónustar fyrst og fremst sjávarútveginn, einnig annan iðnað.  

„Við þjónustum einnig drykkjavöru- og sælgætismarkaði og höfum gert á undanförum árum og erum einnig mjög sterk á garðyrkjumarkaðinum. Þessu til viðbótar erum við að selja rekstrarvörur, til að mynda vinnufatnað og verkfæri fyrir þessa markaði,” segir Brynjar.  

Hann segir aðspurður að helsti markaður fyrirtækisins sé íslenski sjávarútvegurinn.  

„Við erum sterkust í sjávarútvegi og okkar ær og kýr er gamli góði bylgjukassinn sem er alltaf gríðarlega sterkur, svo eru það öskjur og aðrar umbúðalausnir fyrir sjófrystan iðnað og við erum mjög góðir þar. Einnig erum við með bindiborða, límmiða og aðrar merkingar, poka og annað slíkt. Síðan kemur búnaðurinn inn í þetta, þá erum við með vélar sem binda utan um kassana,” segir Brynjar. 

Hann segir að sjálfvirknivæðingin sé sífellt að verða meiri í sjávarútvegi og öðrum iðnaði.  

„Við eru með margan annan vélbúnað, eins og vélina hérna og í básunum okkar sem getur reist kassa og sett í poka sjálfvirkt líka í leiðinni. Við erum mjög sterkir í ýmsum vélbúnaði tengdum framleiðsluiðnaði á Íslandi,” segir Brynjar.  

• Blogga um frétt