Segja fullyrðingu MAST alvarlega

Andstæðingar sjókvíaeldis segja fullyrðingu Matvælastofnunar í umfjöllun Ríkisútvarpsins, um að ekkert bendi til annars en að leyfi verði gefið út til laxeldis í Seyðisfirði, alvarlega. 

Fullyrða þeir að bæði skipulag og framkvæmd séu haldin verulegum ágöllum sem skera þurfi úr um hvort standist kröfur laga áður en hægt sé að fullyrða nokkuð um mögulegar leyfisveitingar.

Þetta kemur fram í tilkynningu frá AEGIS, hópi sem samanstendur af félögunum VÁ félag um vernd fjarðar, Landvernd, Náttúruverndarsamtök Íslands, Ungir umhverfissinnar, SUNN - Samtök um náttúruvernd á Norðurlandi, NASF - Verndarsjóður villtra laxa og Íslenski náttúruverndarsjóðurinn, auk fjölda þjóðþekktra einstaklinga.

„Alvarlegir ágallar“

Segir þar jafnframt að ekki hafi verið skorið úr um fjölmörg álitamál er varða nýlega leyfisveitingu stofnunarinnar til sjókvíaeldis á Vestfjörðum. Liggja þau hjá Úrskurðarnefnd umhverfis og auðlindamála.

„Eru alvarlegir ágallar meðal annars fólgnir í því að ekki er búið að taka tillit til þeirrar ógnar við fjarskiptaöryggi sem fyrirhuguðu sjókvíaeldi fylgir vegna svokallaðs Faricestrengs sem liggur um Seyðisfjörð og er grundvöllur þriðjungs fjarskiptaöryggis Íslands við umheiminn og enn stærri hluti af fjarskiptaneti Færeyja,“ segir m.a. í tilkynningunni.

„Hafa umsagnir félagsins Farice ehf. sem er í ríkiseigu þannig verið hunsaðar af yfirvöldum en þar kemur fram að nauðsynlegt sé að breyta fjarskiptalögum til að tryggja öryggi strengsins ef af fyrirhuguðu eldi í Seyðisfirði verður.“

Sýndu nýtt myndskeið á samstöðufundi

Samstöðufundur var haldinn gegn sjókvíaeldi í Seyðisfirði 12. október. Fullt var út úr húsi í félagsheimilinu Herðubreið.

Þar var nýtt myndskeið sem sýnir samstöðugjörning þar sem kajakræðarar draga línu í sjóinn með því að raða sér upp í röð, kveikja á neyðarblysum og loka þannig firðinum með táknrænum hætti. 

Lagið Oral sem Björk Guðmundsdóttir samdi og flytur ásamt stórstjörnunni Rosalíu ómar undir myndskeiðinu, en lagið gaf Björk til baráttunnar gegn sjókvíaeldi við Ísland.

Frá samstöðufundi á Seyðisfirði 12. október. Ljósmynd/Juanjo Ivaldi

• Blogga um frétt