Á síðustu fimm árum hafa Samherji Ísland og Samherji fiskeldi varið meira en því sem hagnaður félaganna nemur í fjárfestingar beint í rekstri þeirra. Á meðal fjárfestinga eru ný skip, vinnsluhús og tækjabúnaður. Náði hlutfallið heilum 145% árið 2020 þegar Samherji vígði nýtt vinnsluhús á Dalvík.

Þetta er á meðal þess sem kom fram í erindi Baldvins Þorsteinssonar, stjórnarformanns Samherja hf., á Sjávarútvegsdeginum og fjallað er um í færslu á vef Samherja.

Baldvin sagði stöðugar fjárfestingar á undanförnum árum hefðu skapað Samherja visst samkeppnisforskot. Fjárfestingar félagsins síðustu ár hefðu miðast við endurnýjun skipaflotans og aukna verðmætasköpun á Íslandi. Fjárfestingar Samherja í rekstrinum, þ.e. í skipum, vinnsluhúsum og tækjabúnaði, nema alls 31,8 milljörðum króna á síðustu fimm árum á verðlagi hvers árs, að því er segir í færslunni.

„Samherji hefur fjárfest fyrir hærri fjárhæðir en hagnaður félagsins hefur verið. Þetta hefur verið gert til að framleiða verðmætari afurðir í framtíðinni. Ef við lítum á síðustu fimm árin, var erfiðleikum háð að fjárfesta á meðan heimsfaraldurinn geisaði. Við munum halda áfram á sömu braut á komandi árum,“ sagði Baldvin í erindi sínu.

Fjárfestingar sem hlutdeild hagnaðar Mynd/Samherji

„Stærsta einstaka verkefnið er uppbygging landeldis á Reykjanesi sem er spennandi tækifæri. Við sjáum að viðskiptavinir okkar vilja fjölbreytt vöruframboð og laxinn er orðinn stærsta varan í flestum löndum.“

Greindi Baldvin frá því að skóflustungan að fyrsta áfanga landeldisstöðvar Samherja fiskeldis á Reykjanesi verður tekin 15. nóvember. „ Kostnaður við fyrsta áfangann er um 35 milljarðar króna en fullbúin mun landeldisstöðin á Reykjanesi kosta um 95 milljarða króna. Við þurfum sömuleiðis að endurnýja skipaflotann og auka þar með verðmætasköpun og minnka kolefnissporið.“

Sjávarútvegsdagurinn er árlegur fundur Deloitte, Samtaka fyrirtækja í Sjávarútvegi og Samtaka atvinnulífsins og var haldinn 15. október síðastliðinn undir yfirskriftinni „Hvað næst?“. Var fjallað um stöðu og framtíðarhorfur í fiskeldi, veiðum og vinnslu.

Tengdar fréttir

Samherji

Skipin í höfn og komin í sparifötin

• Hæstiréttur hafnar kröfu Þorsteins Más
• Samherji hafði betur gegn Odee
• Fyrrverandi starfsfólki „sé haldið í spennitreyju“
• Þúsundir smáskilaboða fundust í tölvu

» Fleiri tengdar fréttir

• Blogga um frétt