Festa kaup á róbót á sleða

Samey Robotics og landeldisfyrirtækið Laxey í Vestmannaeyjum hafa undirritað samning um kaup á róbóta sem verður á sleða í sláturhúsi Laxeyjar, að því er fram kemur í tilkynningu.

„Til þess að spara gólfpláss mun róbótinn sitja á sleða sem færir hann úr stað svo hægt sé að stafla 25 kg laxakössum á 6 bretti sem liggja samsíða á gólfinu. Róbótakerfið mun lesa á miða á kössunum og stærðarflokka á brettin miðað við gefnar upplýsingar,“ Segir í tilkynningunni.

Samey Robotics er 35 ára gamalt íslenskt hátæknifyrirtæki sem sérhæfir sig í sjálfvirknilausnum með róbótum. Fyrirtækið hefur afhent yfir 200 róbótakerfi í fjölmörgum löndum og eru flest kerfin í laxavinnslum á Íslandi, Noregi, Færeyjum, Kanada og Bretlandi.

„Tímabundið vinnsluhúsnæði okkar í Vestmannaeyjum leyfði ekki hefðbundna Róbóta lausn vegna plássleysis og því kom hugmynd að þessari nýju lausn með færanlegum róbót. Íslenskt hugvit og gríðarlega mikil reynsla í vinnslubúnaði getur oft gert kraftaverk í að leysa það sem sýnist vera vandamál. Ef þessi lausn hefði ekki komið upp þá væri eina leiðin sú að stafla kössunum með handafli og væri þetta verkefni mest slítandi og líkamlega erfiðasta starfið í vinnslunni sem er núna tekið út með þessari lausn frá Samey Robotics,“ er haft eftir Kristmanni Kristmannssyni verkefnastjóra vinnslu hjá Laxey.

• Blogga um frétt