Rekstur fiskeldisfyrirtækisins Arnarlax tekst nú á við háan kostnað og litla framleiðslu. Hefur velta félagsins dregist saman um tæp 67% eða úr 41,9 milljónum evra í 14,3 milljónir evra, það er rúmlega sex milljörðum íslenskra króna í um tvo miljarða íslenskra króna.

Þetta kemur fram í tilkynningu til norsku kauphallarinnar þar sem eignarhaldsfélag fyrirtækisins (Icelandic Salmon) er skráð. Þar er farið yfir uppgjör þriðja ársfjórðungs og er þar bent á að um þriggja milljóna evra tap var á rekstrinum án tilliti til skatta og fjármagnsliða (EBIT) á tímabilinu. Til samaburðar skilaði félagið þriggja milljóna evra hagnað sama ársfjórðung 2023.

Samdráttinn er sagður stafa af lítilli framleiðslu og áframhaldandi líffræðilegum áskorunum frá því fyrr á árinu, sem leiddi til einskiptiskostnaðar upp á 0,4 milljónir evra. Rekstrarniðurstaða á hvert framleitt kíló af laxi var neikvæð um 1,71 evru á þriðja ársfjórðungi, en ef leiðrétt fyrir einskiptiskostnaðinn var hún neikvæð um 1,46 evru.

Frétt af mbl.is

Staðfesta 120 milljóna króna sekt á Arnarlax

Aðeins 1.750 tonnum var slátrað úr sjókvíum félagsins á Vestfjörðum á þriðja ársfjórðungi, en rúm fjögur þúsund tonnum var slátrað á sama tímabili í fyrra. „Sláturmagn hefur aukist frá því sem var á fyrri ársfjórðungi, en hélst í lágmarki þar sem samstæðan lagði áherslu á líffrílega uppbyggingu,“ segir í tilkynningu félagsins.

Binda vonir við árangur aðgerða

„Á þriðja ársfjórðungi náði Icelandic Salmon stöðugleika í kjölfar líffræðilegra áskorana frá síðasta vetri og vori. Sláturmagn hélst lítið sem hafði áhrif á ársfjórðungsuppgjör. Hins vegar hefur áhersla samstæðunnar á vöxt lífmassa byggt upp traustan grunn fyrir bata og framtíðarvöxt,“ segir í tilkynningunni.

Áætlanir gera ráð fyrir að framleiðsla ársins nái 13 þúsund tonnum og að framleiðslan vaxi á næsta ári í 15 þúsund tonn.

Björn Hembre forstjóri Icelandic Salmon segir unnið að því að koma framleiðslunni í 26 þúsund tonn á núverandi leyfum. mbl.is/Hari

Kveðst félagið binda vonir við að nýjar aðgerðir til að verjast fiskilús, aukin útsetning seiða og fjárfestingar í seiðastöðvum skili bættri afkomu þegar fram líða stundir.

„Til lengri tíma litið sjáum við verulegan vaxtarmöguleika allt að 26.000 tonn á núverandi leyfum okkar og erum fullviss um að við getum náð þessu markmiði. Þessi metnaður er í takt við sýn samstarfsaðila okkar og við eigum í nánu samtali við yfirvöld, lánveitendur og aðra samstarfsaðila til að knýja áfram þennan vöxt,“ segir Björn Hembre forstjóri félagsins í tilkynningunni.

Tengdar fréttir

Fiskeldi

Arnarlax brýtur 100 þúsund tonna múrinn

• Slátrað úr kvíum við Haukadalsbót
• Fordæmalaus andstaða ekki í vegi eldis
• Sveiflukennt ár fyrir laxeldið
• Fyrstu seiðin komin í Viðlagafjöru

» Fleiri tengdar fréttir

• Blogga um frétt