Ráðstafanir vegna fiskistofna samþykktar

Verndunar- og stjórnunarráðstafanir fyrir norsk-íslenska síld, makríl, búrfisk (búra) og ýsu á Rockall-banka voru samþykktar á ársfundi Norðaustur-Atlantshafsfiskveiðiráðsins (NEAFC), sem var haldinn í London í síðustu viku.

Samþykktirnar gilda fyrir árið 2025 og eru gerðar á grundvelli nýjustu ráðgjafar Alþjóðahafrannsóknaráðsins (ICES). Stjórnunarráðstafanir fyrir háf voru einnig framlengdar auk banns við veiðum á hámeri, að því er segir í tilkynningu.

Þá samþykktu öll aðildarríki tillögu um stjórn karfaveiða í Síldarsmugunni eftir ósamkomulag til margra ára.

Ekki liggur fyrir samkomulag varðandi veiðar úr deilistofnunum á norsk-íslenskri síld, kolmunna og makríl. Því nær ákvörðun fundarins eingöngu til sameiginlegs viðmiðunar heildaraflamarks, að ríkin skuli setja sér takmarkanir og að öðrum en aðildarríkjum sé óheimilt að veiða úr þessum stofnum á úthafinu.

Á grunni vísindaráðgjafar ICES var að auki samþykkt áframhaldandi bann við veiðum á karfa á Reykjaneshrygg. Rússland greiddi atkvæði, eins og hingað til, á móti banninu.

• Blogga um frétt