Jólasíld ársins í fötur
Setja bókamerki
Að undanförnu hefur starfsfólk fiskiðjuvers Síldarvinnslunnar í Neskaupstað unnið við að setja jólasíld ársins í fötur. Jólasíld Síldarvinnslunnar hefur verið framleidd í áratugi og er farið eftir strangri uppskrift við framleiðsluna, að því er segir í færslu á vef útgerðarinnar.
Fram kemur að það færist bæði stemming og mikil gleði í mannskapinn við þessa vinnu, en síld er víða ómissandi partur af hátíðarhöldunum.
Verkun hófst í september
Samkvæmt venju hófst verkun á hinni geysivinsælu jólasíld Síldarvinnslunnar í september og er uppskriftin leyndarmál. Þeir sem lengst stýrðu framleiðslunni voru Haraldur Jörgensen og Jón Gunnar Sigurjónsson en þeir Sigurpáll Hlöðversson rekstrarstjóri, Oddur Einarsson yfirverkstjóri og Karl Rúnar Róbertsson gæðastjóri hafa tekið við keflinu.
Ofuráhersla er lögð á nokkra þætti þegar framleiðslan fer fram, að sögn þeirra. „Í fyrsta lagi þarf síldin að vera norsk-íslensk gæðasíld sem er nýveidd og flutt vel kæld að landi. Í öðru lagi þarf að flaka síldina strax og hún berst að landi og skera hana niður í hæfilega bita. Í þriðja lagi þurfa bitarnir að liggja í saltpækli í körum í ákveðinn tíma og að því loknu í edikslegi. Í fjórða lagi eru síldarbitarnir settir í tunnur með edikslegi og þar liggja þeir þar til þeim er pakkað í fötur með sykurlegi ásamt grænmeti og viðeigandi kryddjurtum sem eiga sinn þátt í að skapa hið unaðslega og eftirsótta bragð,“ segir í færslunni.
Þessi merka jólasíld er framleidd fyrir starfsfólk Síldarvinnslunnar og þá sem tengjast fyrirtækinu. Auk þess fá Hosurnar, líknarfélag starfsmanna Fjórðungssjúkrahússins í Neskaupstað, einnig síld í ákveðnu magni sem er seld til styrktar sjúkrahúsinu.
Kona á sextugsaldri úrskurðuð í varðhald
Þrír íslenskir ríkisborgarar látið vita af sér
Krafa gerð um gæsluvarðhald
Svona er nú komið fyrir borgarbarninu
Fimm í haldi á Akureyri vegna þriggja mála
Baðlón við Holtsós í skipulagsferli
Netanjahú: Munu gjalda dýru verði
Smávirkjunin sem varð að stórmáli