Veiðigjöld tóku breyt­ing­um um ára­mót­in og hækk­aði álagn­ing á flest­ar teg­und­ir auk þess sem gjald nú nær til nokkurra teg­und­a sem ekki mynduðu gjald­stofn á síðasta ári.

Útreikningar á til grundvallar veiðigjalds byggja á afkomu veiðanna og sveiflast því gjaldið ár frá ári, en gjöldin hafa hækkað mikið undanfarin ár. Athygli vekur að mesta hlutfallslega hækkun veiðigjalds milli ára að þessu sinni er í tilfelli makríls sem hækkaði um 483% og endaði í 10,43 krónum á kíló.

Heilt yfir eykst álagning á uppsjávartegundir verulega milli ára og er veiðigjald á síld 10,09 krónur á þessu ári sem er 145% hærra en í fyrra. Auk þess hækkaði veiðigjald á loðnu um 86% í 7,29 krónur og kolmunna um 30% í 4,16 krónur.

Af fiskitegundum hækkaði gjald mest í krónum talið í tilfelli grásleppu, úr engu í 11,31 krónu. Ekki hefur verið greitt veiðigjald af grásleppu áður og er ástæða þess að veiðarnar hafa áður fyrr ekki verið stýrðar með kvóta, en tegundin var kvótasett með lagasetningu á síðasta ári.

Þá hækkaði gjald á rækju úr engu í 12,77 krónur. Ástæða þess að tegundin var undaskilin veiðigjaldi á síðasta ári var að niðurstaða útreiknings svokallaðs reiknistofns var neikvæð. Hið sama átti við um grálúðu og gulllax, en veiðigjald hefur verið sett á gulllax árið 2025.

Mikil hækkun á undanförnum árum

Ef litið er til botnfisktegunda verður gjald á þorsk á þessu ári 28,68 krónur sem er 8% hærra en í fyrra. Einnig hækkaði veiðigjald á karfa um 34%, ufsa um 12%, á keilu um 24%, hlýra um 27% og steinbít um 10%. Þá hækkaði gjald á djúpkarfa um 168% og endar í 12,62 krónum á kíló.

Gjald á ýsu lækkar hins vegar um 9% og verður 20,21 krónur auk þess sem veiðigjald á skarkola og skötusel lækkar.

Frá árinu 2022 hefur veiðigjald á allar botnfisktegundir hækkað og er í flestum tilfellum um að ræða helmings hækkun eða meira.

Veiðigjald á hverja veidda langreyði verður 73.832 krónur á þessu ári sem er 5% aukning frá síðasta ári. Einnig hækkaði gjald vegna hrefnuveiða um 5% og verður það 11.797 krónur fyrr hverja hrefnu.

Greiða þarf 737 krónur fyrir hvert tonn af lönduðum sjávargróðri en greiddar voru 702 krónur á síðasta ári.

Ofangreindar breytingar eiga sér stað vegna útreikninga svokallaðs reiknistofns og eru ekki afleiðing stefnubreytingar stjórnvalda.

Uppfært 8. janúar kl 08:15: Í auglýsingu matvælaráðuneytisins í Stjórnartíðindum um veiðigjald á árinu 2025 kom fram að veiðigjald þorsks yrði 26,68 krónur á þessu ári. Sú auglýsing var hins vegar röng og er rétt að veiðigjaldið á þessu ári er 28,68 krónur fyrir þorsk. Fréttin hefur verið uppfærð með tilliti til þessa.

Tengdar fréttir

Veiðigjöld

Sex samstæður greiddu fimm milljarða

• Brim og Samherji greiddu 19% veiðgjalda
• Veiðigjöldin tæpir 11 milljarðar í fyrra
• Lýsa áhyggjum af áformum ríkisstjórnar
• Hærra gjald gæti leitt til lokana

» Fleiri tengdar fréttir

• Blogga um frétt