Svo hvasst að tæplega gekk að toga

„Það gekk á ýmsu,“ er haft eftir Þórhalli Jónssyni skipstjóra á Gullver NS í færslu á vef Síldarvinnslunnar um síðustu veiðiferð áhafnarinnar.

Gullver landaði 99 tonnum á Seyðisfirði í gær og var aflinn að mestu þorskur og ýsa.

„Við byrjuðum á að leita að ufsa í Berufjarðarál og á Papagrunni með afar litlum árangri. Þá var haldið í Hvalbakshallið, Litladýpið, á Fótinn, Gerpisflak og í Reyðarfjarðardýpið. Ég var að vonast til að fylla skipið en hann brast á með skítaveðri tvo síðustu sólarhringana. Það hvessti svo hressilega að það var á mörkunum að hægt væri að toga,“ segir Þórhallur.

Hann segir janúar oft erfiðan mánuð veðurfarslega og veðrið hafi því ekki komið á óvart.

„Við höldum til veiða strax að löndun lokinni og hann spáir þokkalega allavega fram á sunnudag,” segir Þórhallur í færslunni.

• Blogga um frétt