Aðeins 28% stofna í sjálfbærri nýtingu

„Viðvarandi ofveiði ógnar vistkeri hafsins í Evrópu, fæðuöryggi og líffræðilegri fjölbreytni,“ segir í samantekt umhverfisstofnunar Evrópu (e. European Environment Agency) um stöðu nytjastofna.

Þar segir að þrátt fyrir að samþætt veiðistjórnun Evrópusambandsins hafi sýnt árangur í enduruppbyggingu ákveðinna stofna sé staðan heilt yfir mjög alvarleg.

„Aðeins 28% af mældum stofnum eru nýttir á sjálfbæran hátt og í góðu líffræðilegu ástandi, með augljósan breytileika eftir svæðum,“ segir í samantektinni. Bent er á að 41% nytjastofna í Norðaustur-Atlantshafi og Eystrarsalti séu nýttir með sjálfbærum hætti en það á aðeins við 9% stofna í Miðjarðarhafi og Svartahafi.

„Markmið ESB að endurheimta heilbrigða fiskistofna og tryggja sjálfbæra nýtingu hefur ekki náðst, sem undirstrikar nauðsyn brýnna aðgerða.“

Ná ekki markmiðum um verndarsvæði

Í desember 2022 ákváðu ríki með aðild að alþjóðasáttmála Sameinuðu þjóðanna um líffræðilegan fjölbreytileika (Convention on Biodiversity) að stefna að því að skilgreina 30% af heimshöfunum sem verndarsvæði fyrir 2030.

Umhverfisstofnun Evrópu telur ólíklegt að Evrópusambandinu takist að ná markmiðinu á þessum tímaramma, að því er segir í úttekt á verndun hafsvæða innan Evrópusambandsins.

„Evrópusambandið hefur náð árangri í því að tilgreina ný hafverndarsvæði, bæði sem hluti af Natura 2000 verkefninu og með aðgerðum aðildarríkja. Fyrir vikið meira en tvöfölduðust verndarsvæði í hafinu, í 12,3%, á milli 2012 og 2022. Hins vegar þarf að auka verulega viðleitni til að ná markmiði ESB um líffræðilegan fjölbreytileika að vernda að minnsta kosti 30% af hafsvæði ESB fyrir árið 2030, en einnig tryggja að öllum verndarsvæðum sé stjórnað á skilvirkan hátt. Sem stendur virðist ólíklegt að markmiðinu verði náð.“

Ísland er aðili að umræddum alþjóðasáttmála og var verndarsvæðum á Íslandsmiðum fjölgað um þrjú árið 2023. Alls voru þá verndarsvæðin þar sem ekki má stunda botnveiðar við Íslandsstrendur orðin 17.

Frétt af mbl.is

Þrjú ný bannsvæði botnveiða

• Blogga um frétt