Byggðakvóti dregst saman um 22%

Úthlutað hefur verið almennum byggðakvóta til 42 byggðalaga í 25 sveitarfélögum vegna fiskveiðiársins 2024/2025. Alls hefur verið ráðstafað 3.807 þorskígildistonnum sem er 1.022 færri tonn en á síðasta fiskveiðiári, nemur samdrátturinn milli ára 22%.

Sjö byggðarlög sem fengu úthlutað byggðakvóta vegna síðasta fiskveiðiárs fá það ekki að þessu sinni, en engin ný byggðarlög fá slíkan kvóta. Byggðakvóta er ætlað að styðja byggðarlög í alvarlegum og bráðum vanda vegna samdráttar í sjávarútvegi og mæta áföllum sem fyrirsjáanleg eru vegna verulegra breytinga á aflamarki einstaka tegunda.

Hnífsdalur verður af mestum byggðakvóta, 275 tonn, og Bíldudalur af næst mestum, 270 tonn. Tálknafjörður, Flateyri og Djúpivogur fá mestan byggðakvóta, hvort um sig 285 tonn.

Sundurgreiningu á úthlutuninni má finna neðst í fréttinni.

Mest til Vestfjarða

Greint er frá úthlutininni á vef matvælaráðuneytisins. Þar segir að „byggðalög með færri en 400 íbúa fá 2.259 þorskígildistonnum úthlutað og byggðarlög með fleiri en 400 íbúa fá úthlutað 1.548 þorskígildistonnum. Alls fá ellefu byggðalög lágmarksúthlutun upp á 15 þorskígildistonn og þrjú byggðalög fá hámarksúthlutun 285 þorskígildistonna.“

Mestum byggðakvóta er úthlutað byggðarlögum á Vestfjöðrum og fá þau alls 1.593 þorskígildistonn eða tæp 42% alls almenns byggðakvóta sem úthlutað er á fiskveiðiárinu. Á eftir fylgir Norðurland eystra með rúm þúsund tonn. Minnst er úthlutað til byggðarlaga á Suðurlandi.

Ráðuneytið vekur athygli á því að til viðbótar við úthlutun ársins koma eftirstöðvar frá fyrra ári einnig til ráðstöfunar í þeim byggðarlögum sem slíkt á við. Alls nemur flutningur almenns byggðakvóta milli ára nær 1.038 þorksígildistonnum.

Óskað eftir áliti sveitarstjórna

Þá verður sveitarstjórnum tilkynnt um úthlutun byggðakvóta til einstakra byggðarlaga í dag og mun ráðuneytið leita eftir afstöðu viðkomandi sveitarstjórna hvort þær óski eftir að setja sérstök skilyrði fyrir úthlutun aflamarksins innan einstakra byggðarlaga. Sveitarstjórnum er veittur frestur til 21. febrúar til að senda ráðuneytinu tillögur sínar.

Innsendar tillögur sveitarstjórna verða til kynningar á vef ráðuneytisins eigi skemur en í sjö daga áður en tekin verður afstaða til þeirra, en komi ekki fram óskir um sérreglur mun ráðuneytið beina því til Fiskistofu að auglýsa byggðakvóta fyrir viðkomandi byggðarlög til umsóknar.

• Blogga um frétt