Makrílmálið fer fyrir Hæstarétt
Setja bókamerki
Hæstiréttur hefur samþykkt að taka fyrir mál tveggja sjávarútvegsfyrirtækja gegn íslenska ríkinu, en ríkinu var á fyrra dómstigi gert að greiða fyrirtækjunum samtals um 600 milljónir í bætur vegna tjóns sem þau urðu fyrir við útgáfu makrílkvóta.
Um er að ræða mál sem sjö útgerðarfélög höfðuðu upphaflega gegn ríkinu árið 2019 og fóru fram á greiðslu skaðabóta upp á samtals 10,2 milljarða.
Fimm félaganna féllu frá málarekstri á fyrri stigum, en þar áttu í hlut félögin Eskja, Gjögur, Ísfélag Vestmannaeyja, Loðnuvinnslan og Skinney-Þinganes. Huginn og Vinnslustöðin héldu málunum hins vegar til streitu og báru að lokum sigur úr býtum fyrir héraðsdómi. Vinnslustöðin festi kaup á Hugin í febrúar 2021 á meðan á málsókninni stóð.
Upphaflega byggðu útgerðirnar kröfur sínar á því að ríkið væri skaðabótaskylt, þar sem ranglega hefði verið staðið að úthlutun makrílkvóta, annars vegar árin 2011-2014 og hins vegar 2014-2018. Minna hefði komið í hlut fyrirtækjanna en þeim hefði borið samkvæmt lögum.
Héraðsdómur dæmi að Huginn skyldi fá 329 milljónir í skaðabætur auk vaxta og staðfesti Landsréttur þann dóm. Bætur til Vinnslustöðvarinnar voru hins vegar lækkaðar í Landsrétti úr 515 milljónum, auk vaxta, sem héraðsdómur hafði dæmt niður í 269,5 milljónir.
Í dómi Landsréttar í máli Vinnslustöðvarinnar segir að kröfur útgerðarinnar fyrir árin 2011 og 2012 séu fyrndar. Ríkinu sé þó skylt að greiða bætur fyrir árin 2013 til 2018.
Sem fyrr segir hefur Hæstiréttur nú samþykkt málskotsbeiðnirnar. Leitaði íslenska ríkið leyfis til áfrýjunar í báðum málum, en Vinnslustöðin óskaði jafnframt leyfis til áfrýjunar í sínu máli. Huginn lagðist hins vegar gegn beiðninni.
Í ákvörðun Hæstaréttar segir að virtum gögnum málsins verði að líta svo á að „dómur í því geti haft fordæmisgildi meðal annars um sönnunarfærslu og ákvörðun fjártjóns. Beiðni um áfrýjunarleyfi er því samþykkt“.
Leiksigur í Karphúsinu
Ekkert sem bendir til annars en að þróunin haldi áfram
Mætti til Reykjavíkur til að funda með ráðherra
„Þetta er risasigur“
„Prógrammið er að virka“
„Ég hef ekkert vald til að snúa þessum ákvörðunum“
Staðan verri en þegar lægsta punktinum var náð
Fara í atkvæðagreiðslu um verkfallsaðgerðir