Renate í stjórnarsæti Aðalsteins

Renate Larsen, hagfræðingur og fyrrverandi framkvæmdastjóri útflutningsráðs norsks sjávarfangs (Norges Sjømatråd), var í gær kjörin í stjórn fiskeldisfyrirtækisins Kaldvíkur sem fer með allt sjókvíaeldi á Austfjörðum.

Þetta kemur fram í tilkynningu Kaldvíkur til kauphallarinnar.

Ágreiningur hefur verið í stjórn félagsins og sagði Aðalsteinn Ingólfsson, forstjóri Skinneyjar-Þinganes, sig úr stjórn Kaldvíkur vegna ákvörðunar þriggja stjórnarmanna um kaup á öllu hlutafé í Mossa ehf. og Djúpskel ehf. auk þriðjungshlut í Búlandstindi af Heimsto.

Vildi Aðalsteinn meina að fyrirhuguð kaup með nýútgefnum bréfum í Kaldvík væri á undirverði, en Heimsto er stærsti hluthafi Austur Holding sem fer með um 55% hlutafé í Kaldvík.

Frétt af mbl.is

Slagur innan stjórnar Kaldvíkur

Greint var frá því í síðustu viku að hópur hluthafa með samanlagt um 30% hlut í Kaldvík hefðu komið sér saman um að tefla fram Ingveldi Ástu Björnsdóttur, framkvæmdastjóra hjá Reitum, í sætið sem var autt eftir brotthvarf Aðalsteins.

Austur Holding hafði tilnefnt Larsen og hlaut hún kjör á aukaaðalfundi.

Í stjórninni sitja nú auk Larsen þau Asle Rønning stjórnarformaður, Martin Lein Staveli, Hege Dahl og Einar Sigurðsson. Lars Måsøval er varamaður í stjórn félagsins.

• Blogga um frétt