„Það er bölvuð ótíð“

Togararnir Vestmannaey VE og Bergur VE liggja báðir bundnir við bryggju í Vestmannaeyjum vegna veðurs, að því er segir á vef Síldarvinnslunnar.

„Það er bölvuð ótíð og ég geri varla ráð fyrir að unnt verði að komast á sjó fyrr en á fimmtudagskvöld eða á föstudag. Við erum ósköp rólegir enda byrjar engin vertíð hér af krafti fyrr en loðna lætur sjá sig og það verður varla fyrr en seinni part mánaðarins,“ er haft eftir Birgi Þór Sverrissyni skipstjóra á Vestmannaey.

Togarinn kom til Eyja síðastliðinn föstudag eftir rúman sólarhring á sjó.

togararnir verða við bryggju þar til fer að lægja. mbl.is

Kom síðan Bergur til Vestmannaeyja á laugardag og var landað úr skipinu í gær. Að sögn Jóns Valgeirssonar skipstjóra fiskaðist vel austur af landinu.

„Við fórum frá Neskaupstað og hófum veiðar á Breiðdalsgrunni og síðan var farið í Hvalbakshallið. Þarna var ágæt veiði; mest þorskur með dálítilli ýsu á nóttunni og mest ýsa með dálitlum þorski á daginn. Á meðan við vorum þarna var veður ekki slæmt, svona kaldaskítur. Nú er hins vegar komin hörkubræla og vonsku sjólag. Gert er ráð fyrir að mögulegt verði að halda til veiða á ný á fimmtudag og ekki er ólíklegt að farið verði austur fyrir landið á ný,“ segir Jón.

• Blogga um frétt