Bjarni Sæmundsson seldur til Noregs
Setja bókamerki
/frimg/1/55/32/1553261.jpg)
Gengið hefur verið frá samningum um sölu á rannsóknaskipinu Bjarna Sæmundssyni ti norsks kaupanda. Hefur því verið bundinn endi á rúmlega hálfrar aldar samleið skipsins og íslensku þjóðarinnar.
Þorsteinn Sigurðsson, forstjóri Hafrannsóknastofnunar, tilkynnti starfsfólki í dag um viðskiptin í tölvupósti. Þar kom fram að ætlunin er að afhenda skipið nýjum eigendum um komandi mánaðamót, en ef þörf verður á skipinu í komandi marsralli (stofnmælingu að vori) má fresta afhendingu til fyrsta apríl.
„Það verður söknuður að okkar góða skipi Bjarna Sæmundssyni sem hefur þjónað okkur í ríflega hálfa öld eða frá árinu 1970. Það er samt gott að vita til þess að hann verður áfram í notkun þótt hlutverkið verði annað,“ sagði Þorsteinn í tilkynningunni.
Bjarni Sæmundsson var smíðaður af Schiffbau-Gesellschaft í Bremerhaven í Vestur-Þýskalandi árið 1970, en umtalsverðar breytingar voru gerðar á skipinu árið 2003. Skráð lengd skipsins er 50,26 metrar og breidd 10,6 metrar, en það telur 822 brúttótonn
Holberg Shipping er kaupandi skipsins og býr félagið yfir fjölbreyttu úrvali skipa sem sinna ýmsum verkefnum fyrir viðskiptavini sína. Má nefna sem dæmi brunnbáta, ferjur og eftirlitsbáta.
Fjársýsla ríkisins annaðist söluna en Bjarni Sæmundsson var seldur í gegnum skipasöluna BP shipping agency.
Þórunn væntanleg í lok mánaðar
Hafrannsóknastofnun á von á nýju hafrannsóknaskipi, Þórunni Þórðardóttur, sem hefur verið í smíðum í Vígó á Spáni.
Gert er ráð fyrir að skipið verði þar afhent um eða eftir komandi helgi. „Gangi það eftir má ætla að hún komi til heimahafnar í Hafnarfirði síðustu viku febrúar,“ sagði í tilkynningu forstjórans.
Segir sjúkraflug á Húsavík í uppnámi
Gagnrýna áform um nýja höfn
Milljónir í leigu á ónothæfu meðferðarheimili
Mæli óhikað með þessari meðferð
„Viðbúin því að það geti byrjað að gjósa hvað úr hverju“
Þá finnst ekki hjartslátturinn
Einn til viðbótar í gæsluvarðhald og lagt hald á bifreið