Baldur í stöðu útgerðarstjóra LVF

Baldur Einarsson hefur verið ráðinn í starf útgerðarstjóra Loðnuvinnslunnar á Fáskrúðsfirði. Mun hann hefja störf fljótlega og vinna fyrst um sinn samhliða Kjartani Reynissyni fráfarandi útgerðarstjóra, að því er segir í tilkynningu á vef Loðnuvinnslunnar.

Fram kemur að Baldur sé menntaður sjávarútvegsfræðingur frá Háskólanum á Akureyri og hefur víðtæka reynslu úr sjávarútvegi til sjós og lands.

Baldur hefur meðal annars starfað sem útgerðarstjóri Eskju síðastliðinn sjö ár en lét af störfum þar á síðasta ári og tók Daði Þorsteinsson við keflinu á Eskifirði.

Frétt af mbl.is

Daði Þorsteinsson nýr útgerðarstjóri Eskju

Hrókeringar á skrifstofu

Greint er frá því að Kjartan sem hefur gengt starfi útgerðarstjóra Loðnuvinnslunnar um árabil hefur óskað eftir því að láta af störfum í vor. Þá segir að hann eigi „einstaklega farsælan starfsferil fyrir Kaupfélag Fáskrúðsfirðinga, Loðnuvinnsluna og forvera hennar“ að baki.

Samhliða þessum breytingum mun Steinþór Pétursson taka við hlutverki Kjartans sem fulltrúi Kaupfélagsstjóra og aðstoðarmaður framkvæmdastjóra Loðnuvinnslunnar. Steinþór mun áfram sinna skrifstofustjórn félagsins en starfsheiti hans verður breytt í fjármálastjóra.

• Blogga um frétt