„Veiðiferðin hófst í haugasjó“

Gullver NS landaði 112 tonnum á Seyðisfirði í gær. Mest var af þorski og ýsu en einnig töluvert af karfa, að því er segir í færslu á vef Síldarvinnslunnar.

„Við byrjuðum á Glettinganesflakinu á meðan brælan var að líða undir lok en síðan var veitt í Litladýpi, við Herðablaðið og á Skrúðsgrunni. Við enduðum síðan í Lónsdýpinu í leit að ufsa og karfa en það gekk ekki sérlega vel. Veiðiferðin hófst í haugasjó en að því kom að við fengum sæmilegasta veður,“ segir Þórhallur Jónsson skipstjóri í færslunni.

Haldið var til veiða á ný síðdegis í gær.

„Við gerum ráð fyrir að halda á svipaðar slóðir að löndun lokinni enda hefur verið mjög góð veiði á þeim miðum sem við vorum mest á í túrnum,“ er haft eftir Þórhalli.

• Blogga um frétt