Íslenskt skip óskaði eftir aðstoð

Á ellefta tímanum í gærkvöld hafði skipstjóri íslensks fiskiskips samband við stjórnstöð Landhelgisgæslunnar og óskaði eftir aðstoð við að komast í land þar sem skipið hafði fengið pokann í skrúfuna.

Þetta segir Ásgeir Erlendsson, upplýsingafulltrúi Landhelgisgæslunnar, við mbl.is en hann segir að fiskiskipið hafi verið statt um 60 sjómílur VNV af Patreksflóa.

Varðskipið Þór tók þegar í stað stefnuna á Vestfirði en ákveðið var að annað skip sem var í grenndinni kæmi til aðstoðar og tæki skipið í tog.

Um klukkan 4 í nótt var búið að tengja á milli skipanna og stefna þau inn í mynni Patreksfjarðarflóa og er reiknað með að þau verði komin inn í flóann snemma í fyrramálið.

Að sögn Ásgeirs mun varðskipið Þór halda í áttina að skipunum af öryggisástæðum.

• Blogga um frétt