Guðbjartur Ingibergur Gunnarsson, skipstjóri til margra ára, fagnaði 85 ára afmæli sínu 11. febrúar síðastliðinn og var í tilefni þess rætt við hann í Morgunblaðinu síðastliðinn þriðjudag.

„Ég er bara nokkuð ánægður með starfsferilinn. Ég var mjög heppinn með að lenda aldrei í alvarlegum óhöppum eða slysum og er mjög þakklátur fyrir það. Það hafa orðið miklar breytingar á skipum og útbúnaði hvers konar sem hafa létt mönnum starfið og auðveldara og betra að hafa samband við fjölskyldur í landi,“ sagði Guðbjartur.

Hann er fæddur á Stokkseyri 11. febrúar 1940 og kláraði í Stýrimannaskólanum hið meira fiskimannapróf vorið 1961.

Í Eyjafirði Sæbjörg og Óðinn sigla út fjörðinn, en Guðbjartur var yfirstýrimaður á Sæbjörgu. Ljósmynd/Aðsend

Guðbjartur stundaði sjómennsku mestallan starfsferilinn. Þegar hann hætti til sjós voru liðin 52 ár frá því að hann var fyrst skráður á skip. Hann byrjaði 15 ára á togaranum Surprise og fór árið eftir 16 ára á togarann Ísborg frá Ísafirði. Svo var hann á vertíðarbátum og togurum í nokkur ár. Í september 1969 réðst hann til ÍSAL og var þar í fjögur ár.

Hafrannsóknir í Afríku

Árið 1978 byrjaði Guðbjartur hjá Hafrannsóknastofnun, fyrst í afleysingum en síðan sem fastráðinn stýrimaður. Hann var skipstjóri á hafrannsóknaskipinu Bjarna Sæmundssyni er hann fór á eftirlaun.

Árið 1990 var flutti Guðbjartur áamt eiginkonu sinni til Swakopmund í Namibíu á vegum Þróunarsamvinnustofnunar.

Í Namibíu var Guðbjartur yfirstýrimaður á rannsóknarskipinu Benguela og var svo beðinn að taka að sér að kenna verðandi veiðieftirlitsmönnum í Luderitz. Voru þau í Namibíu í tvö ár. Fóru svo aftur til Namibíu í upphafi árs 1999 og dvöldu þá í eitt og hálft ár. Hann var þá skipstjóri á hafrannsóknaskipinu Welwitschia en síðustu mánuðina að kenna í Sjómannaskólanum í Walvis Bay.

Nánar má lesa um skipstjórann Guðbjart Ingiberg Gunnarsson hér.

Tengdar fréttir

Fólkið í sjávarútvegi

„Auðvitað fylgir því ákveðinn söknuður“

• Feðgar saman í Grænlandstúr á jólum
• Jón stundar nýsköpun í hákarlaverkun
• Fangar sjómennskuna á filmu
• Humarveiðarnar voru skemmtilegt tímabil

» Fleiri tengdar fréttir