Mun eiga samráð um djúpkarfa

Hanna Katrín Friðriksson atvinnuvegaráðherra kveðst ætla að eiga samráð við Hafrannsóknastofnun og hagaðila í tengslum við upplýsingar sem fram koma í greinargerð sem Hafrannsóknastofnun birti á vef sínum fyrr í vikunni um ráðgjöf stofnunarinnar fyrir djúpkarfa. 

Af greinargerðinni mátti skilja að stofnunin hafi verið andsnúin niðurstöðu Bjarna Benediktssonar, þáverandi forsætis- og matvælaráðherra, að gefa út 3.800 djúpkarfakvóta þvert á ráðgjöf vísindamanna. Útgáfa kvótans var sögð gerð til þess að hægt yrði að landa djúpkarfa sem fæst sem meðafli við grálúðu- og gulllaxveiðar sem kvótabundnum afla. 

Frétt af mbl.is

Hafró gagnrýnir kvótaúthlutun Bjarna

Hafrannsóknastofnun benti á í greinargerðinni að til væru leiðir til að koma í veg fyrir eða í það minnsta draga úr því að djúpkarfi fáist sem meðafli. 

Í samtali við 200 mílur á mbl.is segir Hanna Katrín greinargerðina ekki hafa áhrif á núverandi fiskveiðiár enda búið að gefa út veiðiheimildir. Hins vegar hyggst hún ræða málið frekar við vísindamenn Hafrannsóknastofnunar og fulltrúa útgerða.

• Blogga um frétt