Tonn af rússneskum ýsuflökum til Íslands

Það er afar sjaldgæft að flutt sé inn sjávarfang frá Rússlandi til Íslands, sérstaklega unnar vörur. Á árum áður var töluvert af rækju flutt inn til vinnslu á Íslandi, en ekki er vitað til þess að mikil eftirspurn hafi verið eftir ýsu hér á landi, sérstaklega í ljósi stórfelldrar aukningar í útgáfu ýsukvóta síðustu ár.

Útgefinn ýsukvóti á yfirstandandi fiskveiðiári er meira en 76 þúsund tonn, en hann hefur aukist jafnt og þétt ár frá ári frá fiskveiðiárinu 2019/2020 þegar hann var tæp 42 þúsund tonn.

Þúsund krónur á kíló

Ekki er óheimilt að flytja inn rússneskt sjávarfang en rússneskum skipumer ekki heimilt að landa eða umskipa hér á landi. Í ljósi þess að fram kemur að um landfryst flök sé að ræða eru líkur á því að fiskurinn kann að hafa verið landaður í Noregi áður en hann var fluttur til Íslands.

Í skráningu Hagstofunnar er að finna tollverð, svokallað CIF-verð, sem felur í sér kaupverð vörunnar auk flutningskostnaðar, tryggingakostnaðar og alls annars kostnaðar sem leggst á verð vörunnar erlendis og á leið til landsins. Er CIF-verð gefið upp sem 1.234.895 krónur sem gera 1.042 krónur á kíló.

Ekki hefur fengist upplýst hver hafi staðið að umræddum innflutningi eða í hvaða tilgangi.