„Djöflagangurinn engu líkur“

„Það er ekki einleikið hvernig veðrið lætur við okkur þessa dagana. Það hefur í sannleika sagt verið djöfullegt,“ er haft eftir Agli Guðna Guðnasyni skipstjóra á Vestmannaey VE í færslu á vef Síldarvinnslunnar.

„Janúar var í lagi veðurfarslega en febrúar var slæmur og þessir fyrstu dagar í mars hafa verið skelfilegir. Þegar við vorum á landleið var ölduhæðin 10 metrar og djöflagangurinn engu líkur,“ segir hann, en togarinn landaði í Vestmannaeyjum í gær.

„Þetta var stuttur túr hjá okkur. Við vorum að veiðum á Ingólfshöfða í tvo sólarhringa og fengum þar 60 tonn, mest ýsu. Svo gerðist það að allir skjár um borð duttu út og við urðum að koma okkur í land og láta lagfæra tölvukerfið og það gekk vel. Á þessum slóðum sem við vorum á er ekki jafnmikil fiskgegnd og í fyrra. Vertíðarfiskur er ekki kominn þarna. Líklega hefur loðnuleysið þessi áhrif,“ segir Egill Guðni í færslunni.

Vestmannaey hélt til veiða á ný í gær.

„Bölvaðri skítabrælu“

Bergur VE, systurskip vestmannaeyjar, kom til löndunar í Vestmannaeyjum í dag. Veður hefur einnig sett svip á veiðiferðir Bergs að sögn Jóns Valgeirssonar skipstjóra.

„Við lönduðum á Djúpavogi síðastliðinn fimmtudag. Það var langmest ýsa sem fékkst á Ingólfshöfðanum. Það var þokkalegt veður í þeim túr. Síðan var haldið í Lónsbugtina og þá breyttist veðrið til hins verra. Sannleikurinn er sá að tíðarfarið hefur verið ógeðslegt að undanförnu. Í Lónsbugtinni fékkst skarkoli, þorskur og ýsa. Síðan var haldið á Ingólfshöfðann og þar fengum við þorsk í bölvaðri skítabrælu. Við erum svo að landa 63 tonnum í Eyjum í dag og erum fegnir að hvíla okkur á látunum,” er haft eftir Jóni í færslunni.

• Blogga um frétt