Skipverji slasaður: Heimkomu frestað

Haf­rann­sókna­skipið Þór­unn Þórðardótt­ir HF-300, sem áætlað var til lands­ins á föstu­dag, varð að snúa við á heim­sigl­ingu til að koma slösuðum skip­verja und­ir lækn­is­hend­ur.

Móttaka nýja hafrannsóknaskipsins verður því frestað til 12. mars, að því er segir í tilkynningu frá matvælaráðuneytinu.

Tafir urðu á komu skipsins fyrst vegna illviðris sem hamlaði för skipsins, en Þórunn Þórðardóttir þurfti að sækja í var við Færeyjar vegna þessa. Var síðan haldið til Íslands þegar veður fór að lægja en á siglingunni þurfti skipið að snúa við til að koma einum áhafnarmeðlima undir læknishendur vegna handleggsbrots.

Sjaldgæfur viðburður

Þórunn Þórðardóttir var afhent föstudaginn 21. febrúar í Vigo á Spáni og leysir það Bjarna Sæmundsson, sem sinnt hefur hafrannsóknum fyrir Íslendinga í meira en hálfa öld, af hólmi. Bjarni hefur verið seldur til Noregs.

Aldarfjórðungur er liðin frá því að Íslendingar fengu síðast hafrannsóknaskip. Var það Árni Friðriksson HF-200 sem smíðaður var árið 2000 af Asmar skipasmíðastöðinni í Síle. Koma Þórunnar Þórðardóttur mun því marka tímamót í íslenskum hafrannsóknum.

• Blogga um frétt