Ekki leitað til félagsins vegna uppsagna

Bergur Þorkelsson, formaður Sjómannafélags Íslands, segist sjálfur hafa frétt af uppsögn 52 sjómanna á togaranum Vigra RE í fréttum og segir jafnframt enga félagsmenn hafa leitað til stéttarfélagsins vegna uppsagnanna.

Fram kom í umfjöllun Fiskifrétta að sjómennirnir fái forgang í pláss á öðrum skipum Brims.

Frétt af mbl.is

Segja upp 52 sjómönnum

Bergur segir fregnirnar af uppsögnum ekki koma sér mikið á óvart og bendir á að umræða hafi verið undanfarin ár um það hvort Vigra yrði lagt vegna aldurs skips og ástands búnaðar um borð. Vísar hann meðal annars til frystikerfis sem komið er til ára sinna.

Vigri RE er gerður út af Brim en togarinn var smíðaður 1992 hjá skipasmíðastöðinni Flekkefjord slipp og maskinfabrikk AS í Noregi og er því orðinn 33 ára. Togarinn er 66,96 metra að lengd og 13 metra breiður. Brúttótonnin eru 2.157.

• Blogga um frétt