425 milljónir króna á 35 dögum

„Túrinn var veðurfarslega tvískiptur. Í fyrri hlutanum voru samfelldar brælur en í síðari hlutanum algjör blíða,“ segir Bjarni Ólafur Hjálmarsson skipstjóri á Blængi NK í færslu á vef Síldarvinnslunnar.

Frystitogarinn kom til Neskaupstaðar í gær eftir 35 daga veiðiferð með 860 tonn af blönduðum afla og er verðmæti hans um 425 milljónir króna. Löndun hófst í morgun.

„Við veiddum allvíða eða frá Vestfjarðamiðum til Suðausturmiða, en vorum ekkert úti fyrir Norðurlandinu. Veiðin var tiltölulega jöfn, einkum eftir að veðrið batnaði. Karfann veiddum við á Melsekk og þar var mokveiði, það var reynt að stýra veiðinni með tilliti til þess hvað vinnslan réði við. Í sannleika sagt gekk veiðiferðin vel í alla staði enda í áhöfninni vanir og góðir menn sem leysa öll verkefni farsællega. Skipið mun halda á ný til veiða á laugardag og þá er 30 daga túr framundan,“ segir Bjarni Ólafur.

• Blogga um frétt