Íris Róbertsdóttir, bæjarstjóri Vestmannaeyja og formaður Samtaka sjávarútvegssveitarfélaga gagnrýnir harðlega að ríkisstjórnin ákveði að tvöfalda veiðigjöld, taka þetta „risastóra skref um landsbyggðarskatt“ án undirbúnings eða samráðs.

Þetta kemur fram í þætti Dagmála Morgunblaðsins í dag, en þar er rætt við Írisi og Sigfús Inga Sigfússon, sveitarstjóra Skagafjarðar, en þau eru formaður og varaformaður Samtaka sjávarútvegssveitarfélaga og eru ómyrk í máli. Þátturinn er opinn öllum áskrifendum og má sjá með því smella hér.

Ekkert samráð og engin gögn

„Við fáum 9-10 daga til þess að melta þetta, við höfum ekkert heyrt um þetta, það hafði ekkert samráð verið haft, og við eigum að meta hvaða áhrif þetta hefur á okkar samfélög,“ segir Íris. Hún telur undirbúningi frumvarpsins mjög áfátt og beinlínis í andstöðu við lög.

„Það að það skorti gögn og þessi knappi tími… ef við bara tökum þetta tvennt, þá finnst mér það meira en nóg til þess að hér verði staldrað við og tekið upp alvöru samtal og samráð við okkur hjá Samtökum sjávarútvegssveitarfélaga, sem eru 26 sveitarfélög, um það hvaða áhrif þetta mun hafa í okkar nærumhverfi.“

„Okkur finnst og höfum komið því á framfæri við atvinnuvegaráðherra að það sé eðlilegt að það sé haft samráð við hagaðila, en við lítum ekki svo á að Samtök fyrirtækja í sjávarútvegi (SFS) sé eini hagaðilinn í þessu máli. SFS er regnhlífin utan um fyrirtækin sem starfa í okkar samfélögum, en öll breyting á skattlagningu hríslast inn í kerfið,“ segir Íris.

Frumvarpsgerð í blóra við lög

„Við viljum bara fá þau gögn sem atvinnuvegaráðherra byggir á. Þess vegna teljum við að það sé algerlega ótækt að þetta frumvarp sé komið fram án samráðs við okkur og án þess að það liggi fyrir um það gögn.“

Íris telur að þar hafi ráðherra ekki farið að lögum um sveitarfélög, sem áskilji að ríkisstjórnin hafi formlegt samstarf við sveitarfélög „um framlagningu lagafrumvarpa sem varða sveitarfélögin og um stjórn fjármála hins opinbera, verkaskiptingu ríkis og sveitarfélaga og önnur mikilvæg mál sem varða hagsmuni sveitarfélaganna eða fjármál.“

Eins er stjórnvöldum skylt að láta gera kostnaðarmat ef fyrirsjáanlegt er að tillaga að lagafrumvarpi muni hafa fjárhagsleg áhrif á sveitarfélög, en viðkomandi ráðherrar bera ábyrgð á því að slíkt mat fari fram, í þessu tilviki Hanna Katrín Friðriksson atvinnuvegaráðherra.

Tengdar fréttir

Veiðigjöld

Hækkun sögð gera Ísland fátækara

• Fagna hækkun veiðigjalds
• Vegur mun þyngra á landsbyggðinni
• Ráðuneytið afhenti ekki gögn
• Segir samráðsleysi lögbrot

» Fleiri tengdar fréttir

• Blogga um frétt