Sprenging varð í mjölþurrkara

Slökkvilið Fjarðabyggðar var kallað út kl. 01:40 í nótt vegna til­kynn­ing­ar um eld í fiski­mjöls­verk­smiðjunni í Nes­kaupstað.

Slökkviliðið seg­ir í færslu á Face­book að til­kynnt hafi verið um spreng­ingu, mik­inn svart­an reyk frá þaki og ekki hafi verið vitað hvort fólk væri inni.

Voru tveir dælu­bíl­ar og einn sjúkra­bíll send­ir strax á vett­vang. Lagði mik­inn svart­an reyk frá bygg­ing­unni þegar slökkvilið bar að garði.

„Körfu­bíll og dælu­bíll frá Slökkvistöðinni á Hrauni lögðu þá af stað og var einnig sent út heild­ar­út­kall á Reyðarfjörð og Fá­skrúðsfjörð. Bygg­ing­in var rýmd og voru tvö reykkafarat­eymi send inn til leit­ar. Kom í ljós að spreng­ing hafði orðið í mjölþurrk­ara og brennd fita hafði einnig sprungið út úr hon­um. Eng­inn eld­ur var þegar við kom­um á vett­vang en gott loftræsti­kerfi stóð fyr­ir sínu og var ekki þörf á reykræst­ingu af okk­ar hálfu,“ seg­ir í færslu slökkviliðsins.

„Bet­ur fór en á horfðist í fyrstu, en þegar búið var að ganga úr skugga um að eng­inn eld­ur væri í bygg­ing­unni og hætta yf­ir­staðin voru bjarg­ir á leið á vett­vang aft­ur­kallaðar og var aðgerðum slökkviliðs lokið kl. 02:29,“ seg­ir enn frem­ur.

• Blogga um frétt